16.04.2023 Җәмгыять

Илнур Фәйзрахманов Сабан туен уздырмаска өнди

Журналист Илнур Фәйзрахманов махсус хәрби операция вакытында Сабантуйларны үткәрмәскә тәкъдим итә. Бу хакта ул социаль челтәрендә язып чыгып, район башлыкларына, Татарстан Дәүләт Советы депутатларына мөрәҗәгать итә. Үзгәртмичә бирәбез:

«Бүген, соңгы яртыеллыктагы вакыйгалар борылышын исәпкә алып, четерекле, әмма урынлы мәсьәләне күтәрәсем килә. Акыл сатмыйм. Үзем генә җавап табалмаган сораулар белән бүлешәм. 2003 елдан бирле Сабан туйлары, авыл җыеннарында эшләп киләбез. Команда белән дә, үзем генә алып баручы буларак та… Елның-елында, Олимпия уеннарына әзерләнгән спортчылардай, язга чыгуга яңа шигырьләр, яңа шоу номерлары, яңа команда туплый башлый идек. Ә иң көтеп алганы беләсезме нәрсә?! Татарстан башлыгының Сабантуйларны уздыру көннәрен билгеләгән карарын көтү иде.

Ә быел?!

Ә быел, Татарстан Рәисе Сабан туе һәм башка милли бәйрәмнәрне карар нигезендә уздыртмас, дигән зур өметтә калам. Район, шәһәр башлыклары да, этика һәм мораль ягын уйлап, үз халкына аңлатыр, дип ышанам.

Егет-кызларыбыз ут астында булганда, Сабантуйда күңел ачуны күз алдына китерә алмыйм мин.

2013 елда Казанда, «Боинг» очкычы фаҗигасендә үлүчеләрнең кырыгына туры килә, дип, Яңа ел корпоративларын уздырмауны бердәм генә хәл иттеләр бит.

...Күршеңнең, туганыңның иң заманча кораллар кулланып алып барылучы бәрелештә икәнен белә торып, көтү шикелле мәйданда «күшәп» йөрүне, гафу итегез, кабул итә алмыйм.

Әйе. Сабан туйлары – безнең өчен хезмәт урыны. Акча эшләү мөмкинлеге. Әмма быел түгел!!!

2020 елда да уздырмадык бит. Беребез дә үлмәде. Быел да җитәкчеләребезнең акылы өстен чыгар, һәм Татарстан, илдәге вазгыятьне исәпкә алып, милли бәйрәмнәрне уздырудан тыелыр, дип көтәм», – ди Илнур Фәйзрахманов.

---
Матбугат.ру
№ --- | 16.04.2023