Питрәчнең яңа төзелеп килүче мәчетендә беренче ифтар узды (ФОТО)

Кичә 2 апрель көнне Питрәч үзәгендә төзелеп килүче яңа мәчеттә беренче ифтар узды. Бүген район үзәгендә 11600 кеше яши. Һәм моңарчы монда нибары бер мәчет иде. Анысы да зур түгел. Шушы үзәк мәчет янында бүген яңасы торгызылып килә. Беренче ифтар шушы бинаның подвалында оештырылды. Чарада “Матбугат.ру” хәбәрчесе дә бар иде.

Яңа мәчетне “Ханский дом” төзелеш компаниясе торгыза. “Фундамент 23 ел элек үк салынган. Без бу эшкә 2022 елның ноябрендә тотындык”, - дип сөйләде оешма җитәкчесе Ильяс Гыймадов. Бу изге эштә һәр кеше катнаша ала. Чыгымнар зур. Изге Рамазан аенда матур гамәлләр башкарырга ашыгыйк. “Мәчет төзелешенә катнашу - гомерлеккә инвестиция”, - диде Ильяс Фәез улы килгән кунаклар каршында.

Үзәк мәчеттә мөселман кардәшләр Питрәч районы имам-мөхтәсибе Аббас хәзрәт Кадыйров вәгазен тыңлады, Ахшам намазы укыды, су һәм хөрмә белән авыз ачты, ифтар мәҗлесендә катнашты һәм соңыннан Тәрвихка калдылар. “Ханский дом” компаниясе егетләре исә яңа төзелеп килүче мәчеткә экскурсия оештырырга да вакыт тапты.

Бу изге эшкә сез дә үз өлешегезне кертә аласыз. Банк картасы номеры фотода күрсәтелгән.