28.03.2023 Җәмгыять

Сугыш ветераны өен су баскан

Казанда ел башыннан бердәм дежурлык-диспетчерлык хезмәтенә, су басулар турында, 70 мөрәҗәгать кабул ителгән. – Шәһәр районнарында халык үтенеченә тиз ярдәмгә киләләр. Су басулар тәүлек дәвамында күзәтүдә тотыла, – диде башкаланың Гражданнарны яклау идарәсе җитәкчесе Фердинант Тимурханов “эшлекле дүшәмбе” киңәшмәсендә.

Бу уңайдан Казан шәһәр Башкарма комитеты җитәкчесе Рөстәм Гафаров профилактика һәм алдан кисәтү эшчәнлегенә игътибарны көчәйтергә кушты.

Фердинант Тимурханов сөйләгәнчә, кече елгаларда су 25 һәм 26 мартта кискен күтәрелә башлаган. Салмачы һәм Игумново бистәләрендә су басуларда кискен хәл туган.

– Игумново бистәсендәге Проезжая урамында сугыш ветераны өен су баса башлады. Ветеран һәм аның 1нче төркем инвалид кызы туганнарына күчерелде. Хәзер эшчеләр суны суыртырга һәм шул тирәдәге кар сулары агу юлларын чистартырга алынды, – диде ул.

Мирный, Салмачы, Борисково, Әмәт, Петровский, Калуга, 1нче Май бистәләрендәге торбалар һәм кар сулары агу челтәренең 3 меңнән артык кое авызы чистартылган.

Фердинант Тимурханов әйткәнчә, Вертлевка елгасы бер заман Казан картасыннан “юкка чыгарга” мөмкин. Константиновка бистәсендәге төзелеш базары янәшәсендә Вертлевка елгасына киселгән агачлар авып беткән.

Су басуларга каршы эшчәнлек буенча сөйләшүгә йомгак ясап, Рөстәм Гафаров: “Кешеләр су басу ихтималы булган урыннардан җир кишәрлекләре сатып алган, төзегән, рәсмиләштергән. Хәзер алар шәһәр кешеләре санала, шунлыктан без аларны кайгыртырга тиешле булабыз. Су баса торган урыннар буенча техник чишелешләр кабул итү кирәк. Киров районында узган ел чаралар күрелде бит, хәзер анда су басулар бетерелде”, – диде.

Куен дәфтәренә:

Бердәм дежурлык-диспетчерлык хезмәте – 063 (стационар телефоннан шалтыратканда);

8 (843) 236-41-23 (кәрәзле һәм стационар телефоннан);

8 (843) 223-18-83 (торак-коммуналь хуҗалык буенча тавышлы ярдәмче).

Дамир БӘДРИЕВ
Шәһри Казан
№ --- | 28.03.2023