Гөлназ Шәрипҗанова ни өчен тәрәзә төбендә ашауларын аңлатты

“Концерт була дип йөрдем дә, хәзер "концерт булмый" дип әйтә башладым. Чөнки, дөресен генә әйткәндә, без мюзикл әзерлибез. Бу театральләштерелгән тамаша булачак. Моңа кадәр концертлар белән чыкканыбыз булды, әмма концертлардан канәгать булып кайтмый идек. Чөнки булган ресурсларыбызны тулысынча кулланмадык. Үзебезне алып баручы җырчылар итеп кенә түгел, ә театр артистлары итеп тә күрсәтергә телибез. Яшерен-батырын түгел, җырларыбыз да, җырлавыбыз да шуның кадәр генә”, - ди Гөлназ.

 

Аның фикеренчә, эстрадада конкурентлык көчле, шуңа күрә кабатланмаска кирәк. “Бигрәк тә дуэтлар саны бихисап. Безгә “мөгез” чыгарырга кирәк иде. Бу программаны 3 еллап уйладык. Режиссерыбыз – Рафил Галимуллин. Акча ягыннан бик кыйммәтле проект бу. Сәхнәгә куючы – хореограф Артур Хәйруллин. Бездән кала, тагын биш биюче һәм биш уйнаучы бар”, - ди ул.

 

Шәрипҗановларда тагын бер яңалык: ике ай элек алар яңа фатирларына күченде. “Әмма әлегә тәрәзә төбендә ашыйбыз, чөнки өй җиһазларын алырга акча җитеп бетмәде”, - ди Гөлназ.