04.02.2023 Криминал

Авыл советы депутаты 400 мең сумга якын акча үзләштергән өчен суд каршына басачак

Лениногорск муниципаль районының бер авыл җирлеге Советы депутаты, элеккеге фирма директорына карата кузгатылган җинаять эше судка тапшырылган. 56 яшьлек хатын-кыз акча үзләштерүдә гаепләнә, дип хәбәр итә ТР буенча Эчке эшләр министрлыгының матбугат хезмәте.

ТР буенча Эчке эшләр министрлыгының Икътисади иминлек һәм коррупциягә каршы көрәш идарәсе хезмәткәрләре ачыклаганча, 2021 елда әлеге хатын-кыз бер фирманың директоры булган. Ул өченче зат белән мөгезле эре терлеккә печән сатып алу турында килешкән. Шуннан соң кассирга зоотехник исеменнән печән сатып алу өчен акча бүлеп бирү үтенече белән рәсми язулар әзерләргә кушкан. Акчаның бер өлеше чыннан да печән сатып алуга тотылган, икенче өлеше кассага кире кайткан һәм фирма ихтыяҗларына, тагын бер өлеше компания җитәкчесе ихтыяҗларына сарыф ителгән, дип яза Татар-информ.

Шул рәвешле, Россия Тикшерү комитеты ТР буенча идарәсе җитәкчесенең өлкән ярдәмчесе Андрей Шептицкий сүзләренчә, хатын-кыз 381 мең сум акча үзләштергән.

«Ул әлеге җинаятьтә катнашы барлыгын тулысынча таныган һәм китерелгән зыянны түләгән. Тикшерүчеләр тарафыннан җитәрлек дәлилләр тупланган һәм җинаять эше судка тапшырылган», - дип искәртте Шептицкий.

Фото: Фрипик.ком

---
Матбугат.ру
№ --- | 04.02.2023