Татарстан журналистлары Санкт-Петербургның милли тормышы белән танышып кайтты (ФОТО)

Шушы көннәрдә «Татмедиа» АҖ генераль директоры Шамил Садыйков җитәкчелегендә бер төркем Татарстан журналистлары Санкт-петербург һәм Ленинград өлкәсендә яшәүче милләттәшләребез тормышы белән танышып кайтты.

Иң элек кунаклар Татарстан Республикасының Даими вәкиллегендә булып, Муса Җәлил һәйкәленә чәчәкләр салды һәм һәйкәл авторы Әхнәф Зиякаев белән таныштылар.

Соңрак Милләтләр Йортында Петербург журналистлары, Питер порталы Советы әгъзалары һәм Санкт-Петербург җәмәгатьчелеге белəн очрашуы узды. Яңа Татар мәдәни үзәгендә зур чараны «Ак калфак-Нева» рәисе Фирая Рәшитова, Татар мәдәни үзәге рәисе Марс Яркаев, аның урынбасары Шамил Алюшев, шулай ук Татарстан Республикасының Санкт-Петербург һәм Ленинград өлкәсендәге Даими вәкиллеге ярдәмендә оештырды һәм үткәрде.

Очрашулар легендар татар шагыйре Муса Җәлилнең өлкән кызы Люция Җәлиловада, «Файда» төбәк иҗтимагый оешмасының Ленинград өлкәсендәге Дуслык Йортында, Санкт-Петербург Җәмигъ мәчетендә дәвам итте. «Ак калфак-Нева» Советы әгъзасы, Татарстан Республикасының атказанган сәнгать эшлеклесе Винера Абдуллина иҗат остаханәсендә үз эшләрен күрсәтте.

Татар МЕДИА делегациясе түгәрәк өстәл артында Равил Җәфәр улы Панчеев, СПб һәм РФ Төньяк-Көнбатыш төбәге мөселманнары Диния нәзарәте мөфтие, Санкт-Петербург һәм Россиянең Төньяк-Көнбатыш төбәге мөселманнары Диния нәзарәте рәисе, Санкт-Петербург Җәмигъ мәчете имамы белән очрашты. Анда Санкт — Петербург шәһәрендә һәм төбәкләрдә мөселманнарның дини үзенчәлеген формалаштыру мәсьәләләре кузгатылды. Кунаклар Санкт-Петербург Җәмигъ мәчетен карап чыкты.

Фирая Рашитова