Шойгу мобилизацияләнүчеләргә социаль түләүләр исәпләү тәртибен раслады

«Россия Федерациясе Кораллы көчләренә мобилизация буенча хәрби хезмәткә чакырылган Россия Федерациясе гражданнарына айлык социаль түләүне гамәлгә ашыру тәртибен билгеләргә боерык бирәм», – диелә боерык текстында.

 

Документның кушымтасында язылганча, мобилизацияләнүчеләргә айлык түләүләр хәрби вазифага билгеләнгән көннән алып аннан азат ителгән көнгә кадәр бирелә. Кораллы көчләр белән контракт төзелсә, түләүләр килешү үз көченә кергән көнгә кадәр бирелә, дип яза Татар-информ.

 

Тулы булмаган календарь ай өчен социаль түләү күләме бу ай эчендә хезмәттә булган көннәр санына туры килә. Боерыкта шулай ук язылганча, социаль түләү хәрби хезмәткәргә агымдагы ай өчен түләү белән бер үк вакытта, ә декабрьдә – 25енә кадәр исәпләнә.

 

Россиядә өлешчә мобилизация 2022 елның 21 сентябреннән 28 октябренә кадәр үткәрелде. РФ Президенты Владимир Путин хәбәр иткәнчә, бу чорда, үз иреге белән хәрби хезмәткә алынучылар һәм резервчыларны исәпкә алып, 318 мең кеше хезмәткә киткән. Татарстан Республикасы Президенты Рөстәм Миңнеханов 31 октябрьдә Татарстанның өлешчә мобилизация буенча Саклану министрлыгы йөкләмәсен тулысынча үтәвен белдерде.

Фото: РИА Новости