Консерваториягә керергә... Пушкин кушкан!

Кариев театрының вокал буенча остазы Лилия Зәйнуллинага консерваториягә керәчәген Пушкин җаны әйткән! Чынлап, алдамыйбыз! Мәктәп укучысы Лилия лагерьда вакытта дус кызлары белән Пушкин җанын «чакыртып», багып карарга уйлаган (фильмнардан күреп, кечкенә вакытта кайсыбыз гына мавыкмады икән!).

Беренче итеп: «Яңа фатир алырбызмы?» – дип сораган. «Алырсыз!» – дигән Пушкин. Шуннан Лилия, кыюланып, хыялында йөрткән соравын телгә китергән: «Консерваториягә укырга керерменме?» «Керерсең!» – дигән Пушкин.

Озак та үтми, чынлап та, яңа фатир алганнар! Ә менә консерватория хыялын бераз кичектереп торырга туры килгән. Яңа фатирга күченгәч, мәктәп тә, классташлар да алышынган. Һәм Лилия, 8 нче класстан китеп, ул вакытта «модный» сәүдәгәр һөнәрен үзләштерергә һөнәри училищега кергән.

Ләкин музыка барыбер кызны җибәрми! Һәм, урта белем алгач, ул аттестатын тотып, туры мәдәният институтына юл тота. Биергә мин болай да оста дип, хор-дирижерлык юнәлешен сайлый. Зур аудиториягә җыелып, кемнең кайсы педагогта шөгыльләнәсен игълан итәләр. Бөтен кешене әйтеп чыгалар, Лилиянең исемен әйтүче юк та юк. Түзми: «Ә ми-и-ин?» – дип сорый. «Ә син миндә!» – дип, кафедра мөдире, профессор Җәвит Котдусов сәләтле кызны үзенә ала. Музыка тулы, «Сорнай»лы яңа тормыш башлана.

Ә Пушкинның әйткәне барыбер чынга аша! Бераздан Лилия Зәйнуллина консерваториягә сольный вокал факультетына укырга керә.

Сезне 28 нче гыйнвар 18:30 сәгатьтә Лилия Зәйнуллинаның юбилеена багышланган «Былбыл бакчасы» театральләштерелгән концертына чакырабыз!

Билетларны сатып алу өчен сылтама: https://tickets.karievteatr.ru