Әмирхан Еники әсәрләре буенча төшерелгән фильмның беренче фрагменты командага күрсәтелде (ВИДЕО)

Әмирхан Еники әсәрләре буенча төшерелгән «823 километр» фильмының 10 минутлык фрагменты төшерүдә катнашкан командага күрсәтелде.
Режиссер командага күрсәтү өчен Әмирхан Еникинең «Бер генә сәгатькә» хикәясе буенча төшерелгән фрагментын сайлаган иде.

«Фильмны беркемнең дә күргәне юк. Без аны бүген стилистикасын күзаллау өчен генә карыйбыз. Эш, чыннан да, бик кызу бара һәм ул гыйнвар азагында әзер булачак», - диде фильмның продюсеры, «Татаркино» оешмасы директоры Миләүшә Айтуганова.

«Без фильмны карап, кайсы якка таба баруыбызны бәяли алырбыз», - диде ул.

Фильмның бу өлешендә Тинчурин театры артистлары Әлфия Хәсәнова, Лилия Камалиева, Гөлчәчәк Хафизова, Камал театры артисты Илдус Әхмәтҗанов, Кариев театры артисты Илсаф Нәҗипов катнаша. Фильмның күрсәтелгән өлеше Саба районының Курсабаш авылында төшерелгән, дип яза "Татар-Информ" МА.

Фильм «Татар халкының милли тәңгәллеген саклау (2020-2023 еллар)» Татарстан Республикасы дәүләт программасы кысаларында төшерелә. Программа буенча бюджеты - 4 миллион 770 мең сум.

Тулы метражлы нәфис фильмның сценарий авторы – Валерия Байкиева. Режиссерлар – Ирек Хафизов, Әмир Галиәскаров. Продюсер – Миләүшә Айтуганова.