21.12.2022 Спорт

Танылган көрәшче Динар Кәримуллин: Минем өчен ул әти дә, әни дә булды

Динар Кәримуллин — Теләче районы Олы Мәтәскә авылы егете. Аңа 26 яшь. Идел буе дәүләт физик тәрбия, спорт һәм туризм университетын тәмамлаган. Ул милли көрәш буенча — ике, билбау көрәше буенча бер тапкыр дөнья чемпионы. Раил Нургалиев, Илдар Гыйниятуллинны үзе өчен үрнәк көрәшчеләр итеп куя.

— Икесе дә — якташларым. Ничек көрәшкәннәрен карап, алар шикелле булам, дип хыялланып үстем, — ди Динар. — Бүген дә хәтерлим: мәктәптән автобус белән Казанның “Ак Барс” көрәш сараена “Батырлар” бәйгесенә алып киләләр иде. Шушы ике көрәшче өчен җан ата идек. Шул вакытта: “Мин дә шундый көрәшче булырмынмы?” — дип уйлый идем. Аллаһы Тәгалә насыйп итте, андый көннәр килеп җитте, мең шөкер. Ирешкән уңышларым өчен беренче чиратта әниемә зур рәхмәт. Минем өчен ул әти дә, әни дә булды. Дөрес тәрбия бирде, кеше итеп үстерде. Тренерларыма, Лаеш районы җитәкчеләренә рәхмәт. Алар бик ярдәм итә.

— Беренче зур җиңүең кайчан булды?

— 2010 елда Татарстан беренчелеген оттым. Ә тәкәнең беренчесен үзебезнең авылда алдым. Балалар арасында көрәшкәндә савыт-саба, сервиз бирәләр иде. Иң зур бүләк — 100 мең сум акчалата приз булды. Суыткыч, кер юу машинасы, телевизор Сабантуй саен була. Артыкларын саттым.

— Әле гаилә корырга өлгермәдеңме?

— Юк әле, өйләнмәдем. Очрашкан кызым бар. Ул билбау көрәше белән шөгыльләнә, шулай ук дөнья чемпионы. Ярышларымда җан ата. Үзе көрәшкәч, барысын да яхшы аңлый, минем өчен борчыла.

2022 ел минем өчен бик уңышлы булды. 75 кг га хәтле авырлыкта “Манзара” билбавын оттым. Сабантуйларга күп йөрдем. Ульян өлкәсендә узган Бөтенроссия Сабан туенда үз авырлыгымда 1 нче урын алдым. Самарада да баш батыр калдым. Киләсе елда да җиңүләр көтсен иде.

Лилия ЙОСЫПОВА
Ирек мәйданы
№ --- | 21.12.2022