12.12.2022 Шоу-бизнес

Рөстәм Нәбиев: Үләм икән дип уйлаган идем

Хәбәр итүебезчә, билгеле блогер Рөстәм Нәбиев шушы көннәрдә Килиманджаро тавына менде. Бу тауга менү минем өчен иң авыры булды, диде ул. Чынлап та, куллар белән тауны яулау җиңел эш түгел – организмга зур көч килә. 11 декабрьдә Рөстәмнең дә хәле кинәт начарая.

Үзе әйтүенчә, тән температурасы кисәк кенә 40 градуска кадәр күтәрелгән, калтырана, эче нык итеп авырта башлаган.

Ул тиз арада урындагы дәваханәгә мөрәҗәгать иткән.

“Чынлап та, үләм икән дип уйлаган идем. Хәлем шулкадәр начар иде ки: хәтта узган ел төзегән васыятьнамә турында Индираның исенә төшердем. Ике сәгать эчендә тормыш белән хушлашырга өлгердем. Дустым Тимурга “Тормышка матур нокта куйдым. Матур китәм, таулар белән китәм” дип әйтергә дә өлгердем”, – дигән Рөстәм Нәбиев.

Табиблар аңа төгәл диагноз куя алмаган, әмма ярдәм итә алганнар. 4 сәгать дигәндә аның хәле яхшырган. Бераздан инде отельгә кайтарганнар. Бөерләрдә ташлар кузгалган булырга ихтимал дигән фараз булган. Ләкин тикшерүләрдән соң бу диагноз расланмаган.

Исегезгә төшерәбез, Омск шәһәрендә казарма җимерелү аркасында ике аяксыз калган Рөстәм Нәбиев моңа кадәр Казбек, Эльбрус тауларын яулаган иде. Шушы көннәрдә ул Африка континентындагы иң биек нокта – Килиманджаро вулканы түбәсенә менде. Рөстәм тау башына Башкортстан һәм Русия әләмнәрен кадады. Башкортстан Башлыгы Радий Хәбиров Рөстәм Нәбиевның батырлыгын калганнарга үрнәк итеп куйды.

Фото: https://newsbash.ru

Язгөл САФИНА
Өмет
№ --- | 12.12.2022