Айдар Фәйзрахманов җитәкчелегендәге ансамбль яңа тамаша тәкъдим итә

20 ноябрь 18:00 сәгатьтә Г.Тукай исемендәге Татар дәүләт филармониясендә Татарстан Республикасы фольклор музыкасы дәүләт ансамбле «Мастер-класс» концерт тәкъдим итә.

Россиянең атказанган, Татарстанның халык артисты Айдар Фәйзрахманов җитәкчелегендәге Татарстан Республикасы фольклор музыкасы дәүләт ансамбле башкалабызның мәдәни тормышында үзенең мәртәбәле урынын алып тора.

Халык фольклорының җырларын, көйләрен, гореф-гадәтләрен бөртекләп җыю, саклап калу – коллективның һәм аның идея рухландыручысы Айдар Фәйзрахмановның төп үзенчәлеге, бурычы.

20 ноябрь көнне ансамбль «Мастер-класс» концерт дип аталган программасы белән чыгыш ясаячак. Бу көнне артистларыбыз матур чыгышлары белән тамашачыларны сөендерәчәк. Ә тамашачылар халык уен коралларының тарихы һәм оригиналь тавышы белән ләззәтләнә алачак.
Ансамбльнең артистлары барысы да профессиональ дәрәҗәдә җырлыйлар, бииләр һәм төрле уен коралларында уйныйлар. Аларның кулларындагы гармун, курай, кубыз һәм борынгы кораллар гөслә, саз, сорнай, думбыра, ятаган, җәя гаҗәеп көйле яңгырый.

Татарстан Республикасы фольклор музыкасы дәүләт ансамбле яшьләр, балалар алдында да еш чыгыш ясый, яшь буында сәнгатькә, борынгы моңлы җырларыбызга, милли уен коралларына мәхәббәт уята, аларны матурлык үрнәгендә тәрбияләүдә үз өлешен кертә. Әлеге очрашуларның бик зур кыйммәте бар – алар милли моңны, телне, милләтне сакларга өнди.

Татарстан Республикасы фольклор музыкасы дәүләт ансамбленең концертлары искиткеч энергетикага, җыр-моңга күмелеп үтә.