Быелгы "Әниләр марафоны"нда җиңүчеләргә 100 мең сум акча каралган

"Тәртип радиосы" 1 ноябрь көнне Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе белән берлектә "ӘНИЛӘР МАРАФОНЫ"н башлап җибәрә.

Бәйгенең максаты - татар әниләре өчен аралашу, тәҗрибә уртаклашу мәйданын булдыру, буыннан-буынга күчеп килгән гаилә кыйммәтләрен, гореф-гадәтләрне саклау.

Быелгы марафон ярыш формасында узачак, ә, димәк, җиңүчеләр дә, бүләкләр дә була дигән сүз! Һәр елдагыча марафон 21 көн дәвам итәчәк. Бер көнен дә калдырмыйча катнашкан әниләр арасыннан 9 җиңүче билгеләнәчәк! Аларның сигезенә - 10 000 сум, Гран-при иясенә - 20 000 сум тапшырылачак!

Марафонда катнашу шартлары:
1. 1 ноябрьдән башлап, 21 көн дәвамында һәр иртә махсус марафон өчен бер тема тәкъдим ителәчәк. Әлеге темага постларны (текст, фото, видео) көнендә язып барырга тырышыгыз. Барлык постлар да 23 ноябрьгә кадәр (22 ноябрь соңгы көн) урнаштырылып куелырга тиеш.

2. Марафон өчен постлар язганда, татар шрифтын кулланыгыз

3. Һәр постка #әниләрмарафоны хештегын өстәгез

4. Постларга иҗади килү хуплана

Марафон өчен язылган постларга бәяне жюри комиссиясе бирә, җиңүчеләрне дә алар билгели.

Нәтиҗә 29 ноябрь көнне Казанда Г.Тукай ис.Татар дәүләт филармониясе концертлар залында ясалачак.

Тулырак мәгълүмат биредә.