Буада туган телләрне саклау һәм үстерүдә милли мәгариф, мәдәният, социаль өлкәләрдәге эшчәнлек буенча зональ семинар-киңәшмә узды

Буада Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясенең чираттагы зональ семинар-киңәшмәсе узды. Киңәшмәдә Татарстан Республикасы Мәгариф һәм фән, Мәдәният министрлыклары вәкилләре, Идел аръягы районнары башлыклары, мәгариф, мәдәният идарәләре җитәкчеләре катнашты.

​Кунаклар, Исәк авылы мәчетендә булганнан соң, «И.М. Гыймалов» һәм «Р.С. Хәсәнҗанов» крестьян-фермер хуҗалыклары, Буа шәһәренең 1нче балалар сәнгать мәктәбе һәм М.Вахитов исемендәге гимназия эшчәнлекләре белән танышты. Буа шәһәре Үзәк паркында оештырылган мәдәни-интерактив мәйданчыкта районның мәгариф учреждениеләрендә туган телләрне саклау һәм үстерү программасы кысаларында гамәлгә ашырылган чаралар яктыртылды. Район кунаклары Буа дәүләт драма театрында булып, «Апас, Тәтеш, Буа – мәдәни дуга» халыкара сәнгать фестивале кысаларында үткәрелгән чараларны да тамаша кылды. Пленар утырышта билгеләнгән тема буенча эшлекле сөйләшү узды.

​Татарстан Республикасы Дәүләт Советы Рәисе урынбасары, Комиссия рәисе Марат Әхмәтов татар телен, мәдәният һәм сәнгатен үстерүгә өлеш керткән милләтпәрвәрләргә Комиссиянең Рәхмәт хатларын тапшырды.
​