Римма Ибраһимова: “Иремне бүген дә сагынып яшим”

— Римма ханым, ниһаять, ял итәсез, ахры? Авылда ниләр белән шөгыльләнәсез?

— Әле күптән түгел кызым Ләйсәннең җәйге бакчаларында булып кайттым. Хәзер менә туган нигездә. Күрше йортта яшәүче оныкларым белән мәш киләбез. Ишегалдына зур бассейн куйганнар. Шунда рәхәтләнеп чумалар, мин дә алар белән йөзәм. Коенырга бик яратам. Минем өчен чын ял — диңгез ярында ял итү, көч туплау. Ел да Төркиягә барырга тырыша идек, ләкин коронавирустан соң, пандемия чорында җай чыкмады. Кыш көне Азнакайдагы шифаханәдә ял итеп кайтам.

 

— Быел җиләк сөбханалла, җыярга өлгердегезме?

— Бакча эшләренә вакытым бик калмый. Дөрес, сеңлем яшелчәсен, җиләк-җимешен утырта. Аларга булышам. Быел урманга җиләк җыярга бармадым. Аның каравы базардан сатып алып, аз гына шикәр комы салып болгатып, кышка катырып куйдым. Организмга витамин кирәк. Абрикостан кайнатма әзерлисем килә әле.

 

— Римма апа, сезнең кабатланмас тавышыгызны татар эстрадасында берәүнеке белән дә бутап булмый. Талант нәселдән киләме?

— Әтием — офицер, колхоз рәисе булып та эшләде, әнием укытучы иде. Икесе дә иҗатка гашыйк кешеләр. Гармунда уйныйлар, җырлыйлар иде. Унынчы сыйныфта укыганда гаиләбез белән Казанда фестивальдә катнашканыбызны хәтерлим. Без дүрт бертуган. Кызганыч, ике туганыбыз инде вафат. Сеңлебез белән икәү генә калдык. Әти-әни дә мәрхүмнәр. Кечкенәдән җырлый идем. Мәктәптә, авыл клубындагы чаралар миннән башка узмады. Ләкин җырчы булам дип янып-көеп яшәмәдем. Казанга да тарих бүлегенә укырга керәм дип барган идем. Язмыштыр, Габдулла Тукай исемендәге Татар дәүләт филармониясенә килеп эләктем. Бер төркем яшь талантларны Мәскәүдә эстрада буенча укыттылар. Йөзләгән кеше арасыннан миңа да Клара Хәйретдинова, Зиннур Нурмөхәммәтов, Рабига Сибгатуллина һәм башка талантлы шәхесләр белән бергә башкалада белем алу насыйп булды. Бу юлны сайлавыма үкенмим. Мәскәүдән кайткач, Казан училищесында, аннары Мәдәният институтында укыдым.

 

“ГЕЛ ҖЫРЛАП ЙӨРИМ”

— Фәрит белән Ландышның балалары — Әнвәр, Ләйлә, Гомәр, хәтта кечкенә Каюм да җырлый-бии, бик активлар. Аларны сәхнә серләренә сез өйрәтәсезме?

— Мин түгел. Балалар түгәрәкләргә йөри. Музыка мәктәбендә белем ала. Профессиональ белгечләр белән шөгыльләнә. Әти-әнисе дә игътибарлы. Ландышның әтисе гармунда уйный, балаларга элекке онытылып барган халык җырларын өйрәтә.

 

— Кызганыч, Равил абый гына оныкларын күрә алмады. Сез ирегездән бик яшьли калдыгыз бугай?

— Равил белән 25 ел яшәп калдык. Ул яман шештән үлде. Кулдан килгәнчә терелтергә тырыштык. Онкология буенча танылган табиб Владимир Муравьевка да мөрәҗәгать итеп карадым. Машинабызны сатып, чит илгә дәваланырга алып барырга да әзер идек. Тик соң иде шул. Табиб, озак яшисе калмаган, диде. Миңа ул чакта 47 яшь тирәсе. Эштә дә, өйдә дә бергә идек. Бәхетле яшәдек. Равилне соңгы юлга озатканнан соң, 3 ай рәткә килә алмадым. Дәваланып йөрдем. Кан басымы күтәрелде. Кызым Ләйсән 7 яшендә калды. Улым Фәриткә ул чакта 23 яшь иде. Сеңлесен карарга бик булышты. Елап, хәсрәтләнеп утырырга чама юк иде. Акча табарга, баланы мәктәпкә озатырга, эшләргә, тормыш итәргә кирәк. Ирем беркайчан исемнән чыкмый. Шунысына гаҗәпләнәм, җирләгәннән бирле бер тапкыр да төшемә кергәне булмады. Аны бүген дә сагынып яшим.

 

— Римма ханым, озак еллар озын чәч белән йөрдегез дә, кисәк кенә кистердегез, толымнарыгыз кызганыч булмадымы?

— Коронавирустан соң чәчем нык коелды. Шуңа да кистерергә булдым. Хәзер рәтләнде инде, шөкер, тик үстерерменме, кистерерменме, белмим әле, күз күрер.

 

— Сез гастрольләр белән чит төбәкләргә дә еш йөрдегез. Читтәге татар тамашачысы бездәгедән аерыламы?

— Бик күп төбәкләрдә, илләрдә булырга туры килде. Польша, Төркия, Венгрия, Чехословакия, Үзбәкстан дисеңме... Өч тапкыр Финляндиядә булдык. Соңгы тапкыр анда биш ел элек бардым. Мәшһүр җырчы Илһам Шакиров белән чыгыш ясаган чаклар да булды. Читтәге татарлар милли моңга сусаган. Алар татар җырының кадерен, тәмен белә. Берсендә Магадан якларына рус концерты белән барганымны хәтерлим. Зал шыгрым тулы. Күбесе шахтада эшләүчеләр, татарлар. Без русча чыгыш ясый башлагач, татарча җырлавыбызны сорадылар. Кисәк кенә программаны үзгәртеп, татарча концерт куеп кайтканыбызны хәтерлим.