19.06.2022 Шоу-бизнес

Гүзәлия: “Акча китереп бирсәләр, гел ятып кына торыр идем кебек"

Гүзәлия — композитор, җырчы, продюсер, оештыручы... Җырчы буларак хәзер сирәк чыгыш ясаса да, исе китми икән. Бөтен күңеле белән композиторлык һәм продюсерлык эшенә бирелгән.

— Элек җыр текстлары да яза идем. Хәзер анысы белән мавыкканым юк. Җыр сүзләрен шагыйрьләр иҗат итсен, — ди Гүзәлия. — Болай да кайсы шаяртып, кайсы төрттереп: “Гүзәлиянең кысылмаган җире юк”, — диләр. “Кая чакырсалар, шунда чабып барасың”, — диючеләр дә бар. Безнең эш шундый. Чакырганда, ник бармаска?!

Гүзәлия — Чувашстанның Батыр районы Татар Согыты авылы кызы. Туган ягына багышланган “Авыл көйләре” җырына тәүге клибы туып-үскән урамнарында төшерелә. Гомеренең якынча 25 елы Мәскәү белән бәйле. Соңгы елларда Казанда да тора башлады. Күптән күрешкән юк иде, кафеда очрашып сөйләштек. Үзгәргән Гүзәлия: чәчен буяткан, бераз ябыккан кебек тоелды.

— Гүзәлия, үзгәрүләреңнең серен беләсе килә. Нинди чаралар кулланасың?

— Үз өстемдә эшләргә тырышам. Яшьләрдән калышасы килми. Хәзер җәяү күп йөрим. Көненә чама белән 7-10 км дан аз узмаска тырышам. Йөргәндә баш мие яхшырак эшли, саф һавада уйлар тәртипкә килә, кайчак идеяләр дә туа, сорауларга җаваплар табыла, кәеф күтәрелә, калория кими, үз-үзеңнән канәгать буласың. Әле шуны сизәм: җәяү йөри башлагач, көйләр дә күбрәк туа кебек. Шәп җырлар языла һәм тиз арада тарала да. Ә менә өйдән җыенып чыгу бер дә җиңел түгел. Мин бик ялкау, үземне мәҗбүриләп, кулга алып кына торам. Ә болай, акча китереп бирсәләр, гел ятып кына торыр идем кебек (көлә). Төнлә ашарга яратам. Калорияләр белән көрәшәм инде. Тик суны күп эчә алмыйм. Сыйфатлы, тәмле кара чәй яратам. Кан басымы түбән булганга, яшел чәй кулланмыйм. Өйдә кәнфит тотмаска тырышам. Юкса ихтыяр көчем юк. Шуңа кәнфит, торт бүләк итсәләр, тизрәк башкаларга бирәм. Өстәлемдә бал тора, ара-тирә кайнатма булгалый.

— Соңгы вакытта психология белән кызыксына башлагансың. Моңа берәр нәрсә этәрдеме?

— Психология миңа, гомумән, ошый. Әле җырчы Гөлназ Сираевага ияреп, Сюцай дигән цифрлы психология фәне белән кызыксына башладым. Күптән түгел бер психологик уенга бардым. Моңа хәтле үземне яратам дип уйлый идем. Ул үзеңне кайгырту, теләгәнеңне ашау, киенүдән генә тормый шул. Син үзеңне кабул итәргә, ачуланмаска тиеш. Уйлап карасам: үземне беркайчан мактаганым юк икән, бары тик ачуланам гына. Башка кешеләргә гел рәхмәт әйтәм, ә үзем зур эшне ерып чыксам да, мактамыйм. Һаман таләп итәм. Бу дөрес түгел. Хәзер шуны аңладым. Әмма холыкны барыбер үзгәртеп булмый.

— Сөйләшкәндә, 50 гә җиткәндә, дип әйткәләдең. Ул хәтле юк бит әле сиңа?

— Күпләр 38-39 яшь бирә. 50 гә берничә ел гына калды инде — 47.

— Ничек ял итәсең? Чит илләргә еш йөрисеңме?

— Миңа табигать, бакча, мунча булса, шул җитә. Чит илгә исем китми. Баргач та, тиз сагынам. Менә шундый патриот кеше мин. Ике айга бушка юллама бирсәләр дә, 4-5 көннән кайтып китәрмен, дип уйлыйм.

— Гүзәлия, син бит Мәскәүдә кияүдә, шунда яшәп эшли идең. Казанга бөтенләйгә күченеп кайттыңмы?

— Кайттым дип әйтә алмыйм. Ике шәһәрдә дә яшим. Мәскәүдә 25 ел тордым, Казанда әле аз вакыт узды. Монда эшем күп, Мәскәүдә дә җитәрлек. Казанга болай да еш килә идем. Күп проектларым биредә. Һаман саен кунакханә арендалап йөрисе килми. Шуңа монда да төпләндем, тегендә дә элекке тормышым дәвам итә. Казан-Мәскәү арасы хәзер берни түгел.

— Гаилә хәлеңдә үзгәрешләр бар дип ишеттем.

— Хәзер шәхси тормыш турында сөйләгәнем юк. “Бергә яшисезме?” — диючеләргә: “Яшибез”, — дим. “Бергә яшәмисезме?” — дисәләр: “Яшәмибез”, — дим. Элек гаилә тормышын күп сөйләдем. Күз дә тиде, сүз дә керде...

Лилия ЙОСЫПОВА
Ирек мәйданы
№ --- | 19.06.2022