"Татарстан - Яңа Гасыр"да - "Хафизәләм, иркәм!" музыкаль комедиясе премьерасы

16нчы гыйнварда "Татарстан - Яңа Гасыр" телевидениесе "Хафизәләм, иркәм!" музыкаль комедиясе премьерасының телевизион версиясен тәкъдим итәчәк. Әлеге куелыш татарның бөек композиторы Салих Сәйдәшнең 110-еллыгына багышлана.

"Хафизәләм, иркәм!" - 1943 елда Г.Камал пьесасы буенча С.Сәйдәш белән М.Юдин язган әсәр. Милли театрга караган әлеге әсәрнең сюжет сызыгы да, музыкаль чишелеше дә халык җырына нигезләнгән. Әлеге музыкаль комедия композиторның үзенең иртәрәк язылган әсәрләренең традицияләренә мөрәҗәгать итүе белән кызыклы: С.Сәйдәш әлеге әсәрендә бай иҗади тәҗрибәсен куллана. Музыкаль чынбарлыкның төп драматургиясе баш геройларга: Хафиз белән Хафизәгә - һәм халык катнаша торган күмәк күренешләргә бәйле.

Куючы режиссер - Рөстәм Фәтхуллин (Татарстан Җөмһүриятенең атказанган сәнгать эшлеклесе).

Актерлык осталыгы буенча мөгаллимә - Асия Галиева (Татарстанның халык артисты).

Концертмейстер - Татьяна Сафонова (халыкара конкурслар лауреаты).

Хореограф - Таисия Иссина.

Балетмейстер - Ләйсән Хәмитова (Татарстанның халык артисты).

Баш рольләрдә: Рузил Гатин, Гөлнара Байнәзарова, Илнур Байнәзаров, Рафаэль Якупов, Руслан Габдрәфыйков, Диләрә Камалова, Айдар Хәсәншин.

"Хафизәләм, иркәм!" музыкаль комедиясен бу якшәмбе, 16нчы гыйнвар көнне, 14 сәгать 30 минутта карагыз! Спектакль рус телле тамашачыларга да кызыклы булачак, чөнки телеверсия русча субтитрлар белән тәэмин ителгән.