|
|
Бүген кемнәр туган
|
|
Архив
|
01.06.2022 Язмыш
"Мин аякка басачакмын әле"Соңгы кыңгырау көннәре якынлашкан саен, Казанда яшәүче Даниил Вахитовның йөрәк яралары яңара. Яңа гына мәктәпне тәмамлаган, киләчәккә якты өметләр баглаган 17 яшьлек егетнең бер мизгелдә барлык хыяллары челпәрәмә килә. Чыгарылыш кичәсендә алар сыйныфташ егетләре белән бассейнга су коенырга бара. Кечкенәдән суга чумып, йөзү түгәрәгендә шөгыльләнгән егет шул рәвешле ял итәргә тели. Ләкин суга чумганда җайсыз төшеп, муенын сындыра. Табиблар башта аны яшәмәячәк, ди. Арка миенә зыян килгән була. Әти-әнисенең догалары һәм Аллаһның рәхмәте белән Даниил исән. Ул инде ике ел инвалид коляскасында. — Улыбыз ике катлаулы операция кичерде. Табиблар, муеннан кала, Даниилның бер әгъзасы да хәрәкәтләнмәячәк, диде. Әмма туктаусыз күнегүләр, дәвалану эзсез узмады. Улымның аяклары тоя, куллары селкенә башлады. Ул безнең белән сөйләшә. Барысын да аңлый, — ди әнисе Мария. Хәзер табиблар, тернәкләнү курсларын даими үткән очракта, егет бик акрынлап булса да үз-үзен тәрбияли алырлык дәрәҗәдә савыгырга мөмкин, ди. Әлегә ул кеше ярдәменнән башка ашый да, хәрәкәтләнә дә алмый.
Күптән түгел алар Кырымда тернәкләнеп кайткан. Барлык туганнары, якыннары ярдәм итә. Кызганыч, курслар кыйммәт.
— Мәскәүдә “Три сестры” дигән тернәкләнү үзәге белән элемтәгә чыккан идек. Анда бер ай дәвалану 1,5 миллион сумнан артык. Кырымда 200 мең сум тирәсе. Баланы карарга кирәк булгач, эштән китәргә туры килде. IV сыйныфта укучы кызыбыз да бар. Бөтенесе акчага барып төртелә. Соңгы өметне дә сүндерәсе килми. Битараф булмаган кешеләрдән ярдәм сорарга мәҗбүрбез, тамчыдан күл җыела бит, — ди Мария ханым, күз яшьләренә буылып.
Даниил кечкенәдән мотоцикллар белән кызыксынган.
— Бик сорагач, мәктәптә укыганда мотоцикл алып бирдек. Хәзер аны сатарга теләгән идек тә, Даниил каршы. “Аякка басачакмын, мотоциклымда йөриячәкмен, сатмагыз”, — ди, — дип сөйли әтисе Раил абый. Насыйп булсын, егетнең хыяллары тормышка ашсын.
Даниилга ярдәм итәргә теләүчеләр өчен “Сбербанк” картасы номеры: 4276 6200 3883 4986 (Вахитов Даниил Раилевич) исемендә, 8-960-060-24-27 телефонына бәйләнгән.
Эльвира МОЗАФФАРОВА |
Иң күп укылган
|