Иске яңа “МММ”

Бөтен илгә билгеле “МММ” оешмасы җитәкчесе Сергей Мавроди тагын бер финанс пирамидасы төзергә җыена.

Бу юлы – Интернетта. Яңа “пирамида”ның эш тәртибе искесенә охшаган булачак. Хәтта исеме дә элеккесенә аваздаш: “МММ–2011. Мы Можем Многое”.

Ике дистә ел элек Мавроди үзенең күп нәрсәгә сәләтле булуын күрсәтте инде. Ул төзегән компания эшчәнлегеннән 10-15 миллион кеше зыян күрде. Хокук саклаучылар фикеренчә “МММ” җитәкчесе йөз миллион долларга якын акча үзләштергән. Һәм менә яңа елдан Мавроди яңа эш башламакчы. Интернетта барлыкка киләчәк финанс социаль челтәре анда катнашучыларга аена ким дигәндә 20 процент табыш китерәчәк, имеш. Пенсионерлар һәм инвалидларның табышы исә 30 процентка җитәчәк дип вәгъдә итә Мавроди.

Яңа челтәрнең тагын бер финанс пирамидасы икәнлеген “МММ” җитәкчесе үзе дә яшерми. “Тик элеккесеннән аермалы буларак, ул беркайчан да җимерелмәячәк. Чөнки монысы аерым бер ил эчендә генә эшләмәячәк, анда чит ил вәкилләре дә катнаша ала. Аннан соң, мин акчага кагылмаячакмын да, барысы да виртуаль дөньяда хәл ителәчәк”, – ди “пирамида” төзүче.