«Кино+Театр» проекты көзен дәвам итәчәк

Шушы көннәрдә «Кино+Театр» проектына йомгак ясалды. «Татаркино» һәм Г. Камал театрының хезмәттәшлеге көз көне дәвам итәчәк. Әлеге акция кысаларында март һәм апрель айларында инде репертуарда булмаган «Кара чикмән», «Банкрот», «Хуҗа Насретдин», «Ханума», «Бабайлар чуагы», «Җанкисәккәем», «Әлдермештән Әлмәндәр», «Шулай булды шул» спектакльләре күрсәтелде.

Ике ай эчендә иҗади очрашуларга театрның ике дистәдән артык артисты килде, һәм бу, мөгаен, тамашачылар өчен спектакльләрнең видеоязмасын караудан күпкә кадерлерәк, чөнки театрда мондый мөмкинлек еш булмый.

Театрның иң өлкән актеры – Равил Шәрәфиевның иҗатын яратучылар аның белән өч тапкыр күзгә-күз очрашып, аралаша алды.

Билет бәясенең нибары 100 сум булуы теләгән һәркемгә спектакльләрне карау мөмкинлеген булдырды.