Фирдүс Тямаев 10 бозау алган. Ә авыл халкы нишли?

 

– Аллага шөкер, рамазан аена кердек. Уразаны калдырмаска тырышабыз. Шул килеш, концертларда чыгыш ясыйбыз. Шөкер, Аллаһы Тәгалә үзе җиңеллеген биреп тора. Төрле хәбәрләр килеп ирешсә дә, күңелне төшермибез, яхшыга өметләнәбез. Мөгаен, концертлар – минем өчен дә, халык өчен дә күңелгә рәхәт урындыр. Тамашачы тормыш мәшәкатьләреннән арынып, рәхәтләнеп ял итеп китә. Әле концертларыбыз майга кадәр дәвам итә.

 

Авылны да онытып бетермим. Әниемә 10 бозау алып кайтып бирдем. Эре маллары 20гә җитте инде. Әле шулар янында өч ат та бар.  Әнигә барыбыз да булышабыз. Авылда яшәүче энем гаиләсе белән бергәләп эшлиләр. Быел әле каз-тавыкларны да күбрәк алырга исәпләп торабыз. Аларны 150шәр итәрбез, дибез. Бакчабыз да гомер буена зур булды. Туганнарым белән бергәләп эшлибез, бар әйберне уртак итеп тотабыз. Мин, ит кирәк иде дисәм, бүген мал суялар. Мин дә алар өчен барысын да эшләргә әзер.

 

 

– Яз җитүгә, үземә кирәкле дару үләннәрен барлый башлыйм. Тиздән нарат бөреләре җыяр чак җитә. Шуңа әзерләнәбез. Кояш чыкса, күңелләр күтәрелә инде. Көннәр матур хәзер. Урамнан керәсе дә килми. Авылыбызда ике кибет бар. Җаның ни тели, шуны алып кайтып торалар. Шөкер, коронавирустан авыручылар кимеде. Карлар эреп бетсә, бакча эшләренә тотынырга дип торабыз.

 

 

–  Урамда кар астыннан су ага. Бу кар кайчан эреп бетәр икән, дибез. Бакча өчен үсентеләр дә үстергән идек. Алар озынаеп бетте инде. Һич кенә дә теплицага чыгарып булмый әле. Быел яшелчәне мул итеп үстерергә дип торабыз. Элек тә утырта идек. Әмма быелгы бәяләрне күргәч, бакчада ешрак эшләргә кирәк икән, дигән уйга килдем. Быел каз-үрдәкләрне дә, чебешләрне дә күп итеп алырга җыенабыз. Ирем фермер булгач, чәчүлек басулары бар. Ул чәчүгә әзерләнә. Кар астыннан тракторларны чыгарып, төзәтә башладылар. Бәяләрнең артуына бик борчылам. Өч балам булгач, акча күп китә. Балаларга бер шоколад алыйм дип керсәң дә, безнекеләргә өчәү кирәк бит. Хаклары да тешли хәзер. Шуңа да тәм-томнарны азрак ашарга тырышабыз. Үзебез үстергәнгә җитми инде. Менә быелдан башкачарак уйлап яши башладык.

 

 

– Без чәчүгә әзерләнеп бетерәбез инде. Тракторлар төзәтелде. Чәчкечләрне рәтли башладык. Авыл кешесе өенә су кермәсен дип канау казый. Минем бер дә су юлын ачкан юк. Безгә керми ул. Ризыкка да кытлык юк. Күңел сизгәнме шунда, бәяләр артканчы, районга барып, кирәк-яраклар җыйган идек. Шикәр комын да капчыклап алып куйдык. Авыл кешесе килолап алмый бит инде ул. Әмма әллә ни күп әйбер җыймадык. Тоз да җитәрлек кенә безнең.

 

Кайчан кар бетәр, дип аптырыйбыз әле. Лапас түбәсенә кадәр менгән бит. Бер дә бетмәс шикелле. Минем күңел басуга ашыга инде ул. Без өйдә кәлшәләр үстереп азапланмыйбыз. Авылда бер фермер бөтен кешегә җитәрлек итеп үстерә. Шуннан сатып кына алабыз. Быел бәрәңге бакчасын киңәйтербез дип торабыз әле.

 

 

– Авылыбыз белән илгә тынычлык телибез. Яңа гына егетләребезне армиягә озаттык. 7 авылдашыбыз контракт буенча хезмәт итә. Алар өчен догада торабыз.  Шөкер, вирус белән авыручылар кимеде.  Кеше белән дә аралашмый башлаган идек бит инде. Хәзер ичмасам, күршеләргә кереп йөри башладык. Рәхәтләнеп сөйләшеп утырабыз. Матур гына яшәп ятканда,  вирусның яңа төре безгә килеп җитмәсен дип телибез.

 

 

– Аллага шөкер, пенсиягә чыктым. Бу көнне күрә алу да – сөенеч хәзер. Яз җитүне көтәбез. Аннан җиләк вакыты да җитә.  Быел күп булыр кебек тоела. Җәйгә чыккач, безнең тормыш бөтенләй башкачага әйләнә. Күңелләр үсеп китә. Эшкә чумабыз. Җиләк янына гөмбәсен, себеркесен җыябыз. Мәтрүшкә әзерлибез. Сатып алучылар да күп була. Начар уйлар белән яшәмибез. Авырулар бетеп, илләр тынычлансын иде дип телибез. Исәнлек кирәк. Калганы була аның.