“Татар-информ” мәгълүмат агентлыгы республика конкурсында җиңүчеләр арасында

Бөтенроссия халык исәбен алу эшенә әзерлек һәм аның уздырылуын яктырткан массакүләм мәгълүмат һәм коммуникация чаралары арасында ТР Министрлар Кабинеты үткәргән конкурс нәтиҗәләре игълан ителде

Быел 14-25 октябрь көннәрендә уздырылган Бөтенроссия халык исәбен алу эшенә әзерлек һәм аның уздырылуын яктырткан массакүләм мәгълүмат һәм коммуникация чаралары арасында ТР Министрлар Кабинеты үткәргән конкурс нәтиҗәләре игълан ителде.

Бүген “Татмедиа” мәйданчыгында “Татмедиа” ААҖ генераль директоры киңәшчесе, ТР Иҗтимагый палатасы әгъзасы Владимир Шевчук, Республика матбугат һәм массакүләм коммуникацияләр буенча агентлыгы җитәкчесе урынбасары Нурия Беломоина, массакүләм матубгат чаралары җитәкчеләре һәм вәкилләре катнашындагы очрашуда Дәүләт статистикасы федераль хезмәтенең ТР буенча территориаль органы (Татарстанстат) башлыгы Валерий Кандилов белдергәнчә, быел 15 апрельдан 31 октябрьга кадәр вакыт эчендә барган конкурска Казан, Чаллы шәһәрләре һәм 31 муниципаль районның 68 басма һәм электрон мәгълүмат чараларыннан барлыгы 1359 материал тапшырылган. Жюри составындагы Татарстанстат белән Республика матбугат һәм массакүләм коммуникацияләр буенча агентлыгы, республиканың әйдәп баручы журналистлары аларны 5 номинация буенча һәм махсус приз билгеләп 3әр урынга сайлап алган. Призлы урыннарга барлыгы 19 массакүләм мәгълүмат чарасы (кайбер номинацияләрдә бер урынга 2-3се билгеләнгән) лаек дип табылган. Приз фонды 180 мең сум булып, беренче урынга 15 мең, икенче урынга10 мең, өченчегә 5 мең сум акча каралган.

Шул рәвешле, Бөтенроссия халык исәбен алуны иң яхшы яктырткан мәгълүмат агентлыклары һәм Интернет-басмалар арасында “Татар-информ” мәгълүмат агентлыгы, телевидениеләрдән “Яңа Гасыр” телерадиокомпаниясе, радиолардан “Татарстан” дәүләт телерадиокомпаниясе, республика басмаларыннан “Республика Татарстан” газетасы редакциясе, район (шәһәр) басмаларыннан “Бугульминская газета” редакциясе конкурста җиңүчеләр, ягъни беренче урынга лаеклар дип игълан ителде. Лауреатларга ТР Хөкүмәте гамәлгә куйган дипломнар һәм акчалата премияләр тапшырылды. В.Кандилов алга таба “Зур илнең кече бизнесы” дигән исемдә федераль икътисади исәп алу уздырылуын искәртеп, аның буенча да конкурс булырга мөмкин, дип, теманы күз уңында тотарга киңәш итте.