«Ул үзенең йөри башлаячагына шулкадәр ышана, шулкадәр көтә…»

Дәвалау курсын тырышып үткәне өчен мактау кәгазенә кадәр бүләк итә ул аңа. Мондый курслар, дәваланулар, авыр күнегүләр аша әллә ничә кабат үткән шул инде бу сабый. Барган бер җирдә үзен шулай яратып, сокланып калалар. Аякка бик тә басасы, бик тә йөрисе килә балакайның. Сабыр итүе, барлык авырлыкларга түзүе, өйдә даими шөгыльләнүләре дә шуның өчен. Туганнары, танышлары матур күлмәк, уенчык, тәм-том алырсыз дип биргән акчаларны да тизрәк әнисенә бирергә ашыга кыз: «Дәвалануга барырга тотарбыз…»

 

Күңеле белән һич тә авыру бала димәссең Ясминәне. Кешеләрне бик ярата, гел көлеп, елмаеп кына тора. Өйләренә кунак килгәнгә дә дә шатлана, үзе дә каядыр барырга әзер тора. Бу кадәресе – әти-әнисенең аны кечкенәдән дүрт стена арасына бикләмәве нәтиҗәседер дә. Мөмкинлекләре чикле балалар өчен үткәрелгән бөтен чараларга баралар, бергәләп табигатькә чыгалар, коляска белән көн саен урамда йөриләр, өйдә торып укыса да, сыйныфта үткәрелгән барлык чараларда катнашалар. Сыйныфташлары да, башка укучылар да өйләренә әле хәлен белергә, әле концерт куярга килә. Ул үзе дә шигырь сөйләргә, кушылып җырларга, үзенчә биергә ярата. Социаль челтәрләрдә үткәрелгән, онлайн барган конкурсларда катнашып, җиңүләр дә яулаган инде Ясминә.

 

Әнисе Айгөлне сабый чагыннан беләм. Заманында бертуган апамнар белән бер йортта, күршеләр булып яшәделәр, балалары белән бергә үстеләр, укыдылар, тормышка чыктылар… Ясминә – Айгөлләрнең икенче кызлары. Өлкәне Сылуга – 14 яшь,  исеме җисеменә туры килә торган, бик мөлаем, һәр яктан уңган-булган кыз булып үсеп килә.

 

– Сылуны да иртә тапкан идем, ә Ясминәбез 29 атнадан ук туды, – дип искә ала ул көннәрне Айгөл. – Суым китеп, Балтач хастаханәсенә бардым, анда Казанга барырга куштылар…

 

Башкаланың беренче номерлы бала табу йортында, кызганычка, Айгөлне кочак җәеп каршы алмыйлар. Өч көн авырып, аңын җуеп егылгач кына чабыша башлый ак халатлылар. Менә шушы өч көндә бала күпне югалта: кислород кытлыгы белән туган бала, әнисе кайтып киткәч тә, шактый вакыт ДРКБда ята… Хастаханәдән кайтканда үтә дә кечкенә, үтә дә ябык булган Ясминә, тора-бара үсеп, тазарып китә. Тик бу чордагы авырлыклар үтте дип тынычланасы урынга берничә айдан әти-әни күңеленә шик керә. Башын тиешенчә тотса да, кызларының утырып тора алмавыннан, аякларына баса алмавыннан куркып, алар табибтан табибка йөри. Тик, сүз берләшкәндәй, барысы да, җитлекми туу нәтиҗәсе, дип җавап бирә. «Без бит инде – җитлекми туган бала күргән кешеләр. Сылу белән Ясминәбезнең үз-үзләрен тотышы нык аерыла», – дип икеләнсәләр дә, әти-әнигә табиблар сүзенә ышанып, көтүдән башка чара калмый. Тик табибларның «балагыз вакытында тәпи китәчәк» дигән фаразлары чынга ашмый. Ике яшендә инде Ясминәгә ДЦП диагнозы куела.

 

Башта югалып калсалар да, Айгөл белән Ришат әнә шул көннән Ясминәнең киләчәге өчен чын мәгънәсендә көрәш башлый. Кайларга гына алып бармыйлар, нинди генә күнегүләр эшләтмиләр! Алтын куллы Ришат нинди генә җайланмалар ясамый… Ясминә кебек балалар өчен эшләнгән велосипед та сатып алалар, анда йөрергә өйрәтеп кенә калмыйлар, ярышларда катнашып, уңышлы чыгыш та ясыйлар. Кыскасы, бу гаиләдә әти дә, әни дә бер дәрәҗәдә кызларының иң олы хыялы чынга ашсын өчен кулдан килгәнне дә, килмәгәнне дә эшли. Ул мүкәләсә – мүкәли, ул күнегүләр ясаганда аңа кушыла. Бу тырышлыкларның нәтиҗәсе көннән-көн ачыграк күренә: Ясминәнең гәүдә тотышы ныгый, кеше ярдәме белән булса да аякларында шактый ышанычлы басып тора. «Ул үзенең йөри башлаячагына шулкадәр ышана, шулкадәр көтә», – ди Айгөл. Тырышлыкларың бушка китмәсен, уңышлар сиңа, «нәни герой»!

 

P.S. Бу көннәрдә Гозәеровлар чираттагы тернәкләндерү курсларына барырга әзерләнә. 366 мең сум торучы бу курсларга тиешле  сумма инде игелекле кешеләр ярдәме белән җыйналып беткән диярлек. Нибары 32 мең сум тирәсе генә җитми. Ярдәм итәргә теләүчеләр акчаны 4817 7602 5142 2642 номерлы Саклык банкы картасына күчерә ала. Ул шулай ук Айгөлнең телефон номерына да ялганган: 89172493920.