Кыш бабай «кайф тота» (ФОТО)

“Супер-тамада” Гамил Нур Яңа елда эшләүне шифаханәдә ял итүгә тиңли. “Эш түгел, кайф тоту”, - ди ул.

- Алай булгач, көндәшләр күптер инде?

- Күп түгел. Электән үк эшләүче шабашник-артистлар бар инде. Быел тагын үземнең биш-алты дустым һәм укучым Кыш бабай булып эшләргә тели.

- Икмәкне бүлешүдән ни файда?

- Күп булсыннар! Татартелле бабайлар урыстелле гаиләләргә мәгърифәт тарата ала. Тик аларга әллә ни зур “икмәк” эләкми. Миңа да хобби кебек кенә ул. Зур акчаны кызыл чапан киеп түгел, тамада булып эшлим. Аның каравы, Кыш бабай булып искитәрлек күп позитив алырга була. Самими балаларны сөендерү зур шатлык бирә. Алар бит бабайга чынлап ышана.

- Ышанмаганнары нишли?

- Зурайган балалар да ышанган сыман кылана. Бүләк аласылары килә.

ТӨРЕКЛӘР ЯРАТМЫЙ

- Кемнәр Кыш бабайны чакырмый?

- Менә төрекләр һәм гарәпләр аны яратмый. Татарлар исә ярата, тик заказ бирүчеләре бик аз. Бу базар, монда статистиканы алдап булмый ич. Татартелле кешенең барысы да акчалы түрә түгел бит. Дөрес, Казанда татарча сөйләшүче ата-аналар саны артты кебек. Егерме ел буе авылда, “коммунизм төзим”, дип алданып яшәгәннән соң, куп халык шушы арада гына шәһәргә күченеп килде. Алар әле телен югалтырга өлгермәде. Тик татартелле кеше исраф яратмый, акчасы да азрак. Кыш бабайлар шуңа күрә урысча эшли. Татартелле мәгариф учакларында да урысча эшләү бар. Биш ел элек без Резеда Саифуллина белән 10 мең сумлык реклама бирдек, татарча Кыш бабай дип. Бер генә татарча заказ булды. Таныш әби урыстелле балаларын орыша-орыша оныкларына татарча бабай чакыртты. Шуңа игътибар иттем, оныклары татарча шактый сукалый иде. Чыгымнарны исә урысча заказлар, Резеданың “корпоротивкалары” каплады. Гайрәт чикте.

ПСИХОТЕРАПЕВТ БАБАЙ 

- Шулай да кабаттан башлагансыз.

- Өч елдан соң Илфат Фәйзрахманов белән Раиф Усманов бушлай реклама бирергә тәкъдим итте дә кабат ак сакал кидем. Эксперимент кызык килеп чыкты. Өч төрле шалтыратулар китте. Бабай нарколог яки психиатр, димче һәм хезмәткә урнаштыручы булып куйды. Беренчесе: балалыкта калган ир-атлар. Эчеп алалар да Кыш бабайга шалтыратып бушаналар. Шулай ук бала акылында калган сырхаулар аптыратты. Башлары эшләп җитмәсә дә, “бир” сүзен беләләр. Чаңгы, тимераяк, кесә телефоны сорап газапладылар. Икенчесе: авыл клубларына килеп маскарад ясап кит әле, диючеләр. Өченчесе: авылдагы ялгыз һәм фәкыйр хатын-кызлар. Аларының шалтыратырга акчасы җитми. “Дозвон” ясыйлар яки смс кына салалар. Кыш бабайдан я кияү, я эш сорыйлар. Нинди эш дисәң, штукатур маляр, сатучы, җыештыручы яки вахта эшен таптырталар. “Единая Россия” урынында булсам, Кыш бабайны зарлар тыңлар өчен эшка алыр идем!

- Хәзер кемнәргә йөрисез?

- Иске танышларга шатлык өләшәм. Берничә балалар бакчасында эшлим.

МӘСКӘҮ КЕРЕМ КЕРТӘ

- 31 декабрьдә чакыручылар бармы?

- Без 30-31ендә Мәскәүдә эшлибез.

- Татарларгамы?  

- Юк. Татарларга Мәскәүдә Лина Арифуллина әкияти мюзикл куячак. Анда Сөмбел Билалова, Радик Яруллиннар уйнаячак. Ә минем клиент милли түгел – халыкара ширкәт. Урысча һәм бераз инглизчә эшлибез. Бер зур фирма ике ел рәттән чакыра. Кар кызын, эчтәлекне генә ел саен алмаштырырга куша. Узган ел Гөлгенә Кәлимуллина белән бардым, быел Ләйсән Халикованы алам. Ул канат тагып, курайда Моцартны уйнап сәхнәгә чыгачак. Мәскәү урыслары хәйрия чыгымнарын да каплый, керем дә кертә.  

ИСЛАМ САНТА КЛАУСТАН ШИКЛӘНӘ

- Сез дини даирәләргә дә хезмәт күрсәтәсез. Алар Кыш бабайны сорыймы?

- Диндарлар Яңа ел бәйрәменә битараф. Тик балаларга моны аңлату авыр шул. Алар да бу көннәрдә могҗиза көтә. Шуңа күрә зур-зур муллалар да чакыргалый, чөнки Кыш Бабай – христиан түгел бит. “Безнең бабай – текә, ул татарча сөйли, догалар укыта”, - дип аннары балалары горурлана. Америкадагы татар балалары исә христиан Санта Клаустан котлау көтә икән. Андагы төрекләр Хозыр Ильясны уйлап чыгарды. Тик анысы да уңышлы килеп чыкмады. Ә татарны Кыш бабае коткара. Аптыраган аналар Казаннан татарча, мөселманча итеп ролик-котлау сората. Телефоннан шалтыратып та балаларын сөйләштерәләр.

26 ДЕКАБРЬГӘ КАДӘР ШАЛТЫРАТ!

- Ролик салу белән телефоннан сөйләшү кыйммәткә төшәме?

- Хыялланма инде! Бушка! Тик 26 декабрьга кадәр шалтыратып өлгерсеннәр: 89872966029. Яки Интернетка (http://www.facebook.com/gamil.nur) язсыннар! Ә йортка чакырсагыз, ул каприз өчен түләргә туры килер.

Кыш бабай Сезне бик ярата!