Ләйсән Мәхмүтова моңарчы Сөләйманлы иде, хәзер Йосыфлы да булды

Бәби 3 декабрь көнне көндезге 2-3ләр арасында дөньяга аваз сала. Бала тудыру йортыннан әнисе белән улы 9 декабрь көнне кайта. Малай җирән чәчле, караңгы зәңгәр күзле. “Минем беренче улым да шундый иде башта. Беребезгә дә охшамаган. Бусы абыйсына охшаган менә. Кызык. Өстәвенә, һәрчак чәчләре тырпаеп тора. “Гадкий утенок, - дип көлә Ләйсән, - үскәч тагын матураеп китәр әле ул, абыйсы кебек”.

Бала табар алдыннан роддом тәрәзәсеннән кояш чыга, матур көн була. Бала табу белән Ләйсән ире Русланга хәбәр итәргә дип аның номерын җыя. Бар да җиңел узгангамы, әнинең тавышы бик тыныч була. 

- Русланым, малаебыз туды! – ди Ләйсән.

- Ярар, шаяртма инде, - дип җаваплый ире.

- Чын әйтәм! Килеп кара безне.

Ире бу яңалыктан бераз айныгач килеп җитә. Шатлыгының чиге булмый.

Ә менә бала туганчы беренче уллары, 7 яшьлек Сөләйман соңгача “сеңел алып кайт, сеңел алып кайт миңа”, дип тинтерәтә. Шуңа энесе булуын белгәч аптырап кала. Ләкин  көне буе энесе янында бөтерелеп йөргәннән соң кырына утыра. Һәм күңеле тулып елап та җибәрә...

Сөләйманда башта көнләшү сыман хис булып алган. “Син аны миннән күбрәк яратасың мени?”, дип сораганы да бар ди. Ләйсән югалып калмыйча, ни өчен бәләкәй бәбәйгә күбрәк игътибар кирәклеген тиз аңлатып биргән.

Ләйсән – ымнарга ышанучы сирәк кешеләрнең берсе. Шуңа да бала туганчы аның коляскасы, караваты, пеленка, ыштаннары, подгузниклары булмый. Бар кирәк-яракны ире Руслан белән Лилия апасы Ләйсән больницада яткан вакытта алып кайта.

Ләйсәнгә ире әле бүләк алмаган икән: “Мин үземә бүләкне үзем сайларга яратам. Аңа да шулай дидем. Бераз хәл кергәч кибеткә чыгып берәр нәрсә сайлармын әле”. Әле чыршы да куймаганнар икән өйдә. Сөләйман берүзе генә инициатива күрсәтеп йөри ди. Ләйсәннең аның белән шөгыльләнергә вакыты җитеп бетми: инде чыршы уенчыкларын, чыршыны шкафтан табып чыгарган булса да. “Яңа туган бала яныннан китеп булмый бит ул. Гел янында булырга кирәк” - ди Ләйсән.

Исемгә килгәндә, Руслан белән Ләйсәнгә Йосыф исеме - иң якыны. “Ләкин һаман да Йосыфка күнегеп бетә алмыйбыз. Кайвакыт онытылып Сөләйман дип тә җибәрәм әле”, -ди Ләйсән. Бәби ашы Яңа елдан соң булыр дип планлаштырыла.

“Икенче балам туу аркасында яңа хисләр кичердем. Үземне гел башкача тоя башладым. Бер балаң булу бер хәл, ә ике бала анасы булу – икеләтә бәхет икән. Тормышым тулыланып китте. Тулыланып кына түгел, ә түгәрәкләнеп”, - дип шатлыгы  белән бүлешә Ләйсән.

Берүк иманлы, игелекле, сәламәт бала булсын!