09.03.2022 Криминал

Хатынына һәм аның өч баласына бензин сибеп, ут төрткән

Күпләр иң мөһиме – сәламәтлек булуына тора-торып инанганда, дөньяга ябырылган чирләрдән ничек тә исән калырга тырышканда да, кеше җанын кыючыларның, җәбер-золым кылучыларның кимемәве аңлап-аңлатып булмаслык хәл.

Иркутск өлкәсенең Качугский районындагы Тимирязево авылында 28 яшьлек исерек ир язылышмыйча, бер түбә астында яшәүче хатынына һәм аның өч баласына бензин сибеп, ут төрткән. Бер һәм дүрт яшьлек бала, нык пешеп, шунда ук үлгән, ә хатын белән иң кечкенә сабыйны район больницасына озатканнар. Гөнаһсыз ике баланың үлеменә китергән вәхшилекнең сәбәбе – көнчелек. Чиләбе өлкәсендәге Троицк шәһәрендә шулай ук язылышмыйча яшәүче ир белән хатын арасында тавыш чыккан һәм ир ике яшьлек кызын күтәреп торган хатынга пычак белән ташланган. Пычак балага тиеп, ул больницада үлгән.

Ульяновскта 38 яшьлек исерек ир микроавтобус йөртүче 44 яшьлек ирнең күкрәгенә пычак кадаган. Яраланган ир ашыгыч ярдәм чакыртып өлгергән, аңа операция ясаганнар.

Кешеләр шулкадәр рәхимсезләнде, элеккечә тел белән әйткәләшү, кул белән бәргәләшүләр бетте, хәзер пычак, пистолет, автоматлар эшкә җигелә. Мәскәүдә юлдан барган машинадан коралдан атудан яраланган 30 яшьлек ирне ташлап калдырганнар. Әстерхан өлкәсендә җиде кешенең кафеда күңел ачып утыруы пистолеттан атышу белән тәмамланган, дүртесе яраланган. Һәм ил буенча мондый хәлләрне санап бетерерлек түгел.

Ә кар, дөньяны агартырга теләп, ява да ява...

---
Татарстан яшьләре
№ --- | 09.03.2022