«Матбугат.ру» «Дулкын» радиосында эшләгән ди-джейларның хатирәләрен барлады

 

 

 

 

 

 

 

 

 

«Дулкын» радиосында мин 1997 елда эшләдем. Иң күңелле вакытлар дип искә алырга яратам. Коллективыбыз бик дус иде. Радио мине микрофон белән дуслаштырды, аның алдында каушап калмаска, фикереңне секунды белән туплап, турыдан-туры эфирда әйтергә өйрәтте. Иҗади коллективта эшли белү серләренә дә шунда төшендем. Тавышны  көйләргә, логик басымнар куярга өйрәндем. Татар җыр сәнгате белән кызыксынуым да әлеге радиода эшләгән чорда башланды. Кемнәр белән генә очрашмый, интервьюлар алмый идек. Турыдан-туры эфирда олпат шәхесләр белән әңгәмәләр кордык. Күпмедер дәрәҗәдә «Дулкын»да журналистлык тәҗрибәсе алуым белән мин бәхетле. Безне эфир киңлекләрендә йөзәргә өйрәткән Гөлнара апа Зиннәтуллина, Гадилә апа Нургали, Резеда ханым Рөстәмова, Җәүдәт абый Гыйльмановка мин бик рәхмәтле. Шунда бергә эшләгән коллегалар белән дуслык әле дә дәвам итә.

 

 

“Дулкын”га үзем дә аңламыйча, Дилбәр белән Илдусның тапшыруларына кызыгып килгәнмен икән мин. Радио тыңлаган саен: “Бар инде бәхетле кешеләр!” - дип уйлаганнарымны соңыннан гына исемә төшердем! Хикмәт! “Амин” дигән сәгатьләре күп Аллаһы Тәгаләнең. Кешегә түгел, үземә дә әйтмәгән теләгем кабул булды! Уйламаган-көтмәгән җирдән конкурс аша үтеп радиога эләктем! Һәм “Дулкын” минем өчен радио дөньясына беренче адым да, мәктәп тә булды.

 

 

«Дулкын» – FM ешлыгында эфирга чыккан татарда беренче радиоканал. Ул – пионер, аннан соң барлыкка килгән милли коммерцияле радиолар өчен “ничек эшләргә ярый, ниләр эшләргә ярамый” дигән сорауларга иң беренче җавапларны биргән радио. Мин биредә сигналның ничек формалашканыннан алып, ничек эфирга чыгып киткәненә кадәр тулы комплекс эшләү принципларына өйрәндем. Микрофон белән “дуслаштым”. “Дулкын” – минем рәсми рәвештә эшкә урнашкан беренче эш урыным, тормыш университетларымның тәүге курсларыннан берсе. Аннан мин 6 ай дәвамында эшләп, өлкәне эчтән белүче шактый тәҗрибәле белгеч булып чыгып киттем.

 

 

“Дулкын” радиосы мине күп нәрсәгә өйрәтте: кешелекле булырга, тыңларга, аңларга. Театрда эшләгәндә кычкырып сөйлә дип өйрәтсәләр радиода эшли башлагач, тыныч кына микрофонга сөйләргә өйрәнергә туры килде. Театрда эшләгән чорда “йолдыз” буласы килсә, радио дөньясына килеп эләккәч гади кеше булу теләге артты. “Дулкын”да эшләгән чорда мин курыкмыйча радио мөнбәреннән үз фикеремне әйтергә өйрәндем. Чикләүләр юк иде, җитәкчеләр синең һәрбер проектыңны хуплап каршы алалар иде. Мин аларга рәхмәтлемен.

 

 

ГӨЛНИРӘ ГАБДУЛЛА: 

“Дулкын” радиосында  эшләү минем рухи үсешемә ярдәм итте.  Дини кыйбладагы “Рухият” тапшыруым ислам динен тирәннән өйрәнү теләген  тудырды.   Халыкны  кызыксындырган  темалар  да,   сораулар да  бик  күп була  торган  иде.  Эфир аша халык  белән очрашуга   еш кына    дин әһелләрен чакыра  идем. Шунда алар белән аралашуым, шушы  юнәлештә эзләнүем  алга  таба  мине   Россия  ислам университетына алып килде,  бүгенге  көндә Шәригать бүлегендә соңгы  курста белем алам.  “Дулкын”га      инде  “Казан” радиосында  азмы-күпме эш тәҗрибәсе  туплаган  диктор буларак килдем.     Шуңа  күрә эшкә  кереп китү кыен булмады.  “Дулкын” радиосында эшләү, халык белән туры эфирда  аралашу  алга  таба  журналистлык эшчәнлегемдә,  Татарстанның  Азык-төлек  һәм авыл  хуҗалыгы министрлыгында  Матбугат хезмәте  җитәкчесе вазыйфасын башкарганда да  ярдәм  итте. Белгәнегезчә, ул  чакта  Министрлыкны телнең  бөтен нечкәлекләрен тоеп, матур  итеп  саф  татарча, әдәби телдә сөйләшүче Марат  Готыф улы  Әхмәтов  җитәкләде. Һәм телгә карата бездән дә шундый  ук мөнәсәбәтне таләп  итә иде. Ул чакларда “Дулкын” радиосында  алган  тәҗрибәмне  дәвам итеп,   язгы  чәчү һәм урып-җыю чорында  “Татарстан” радиосында  атна саен даими рәвештә “Кыр көндәлеге” сәхифәсендэ   рәхәтләнеп  чыгышлар  ясый идем.   “Дулкын” радиосы күп журналистларны  чыныктырып, аларга  алга  таба   эшләргә туры юнәлеш  биргән радио дип  әйтергә була.  “Дулкын” традицияләрен дәвам итеп, татар телле  башка     радиолар   да  бүгенге  көндә уңышлы  эшләп  торганда,  безнең телебез дә, милләтебез дә югалмас!

 

 

Татар телендә тәүлек дәвамында эшләү мөмкинлеге биргән, татар моңнарын пропагандалаган легендар радио ул «Дулкын»! «Дулкын» мине ирем Илһам белән таныштырды! Менә 23 ел тигез гомер итәбез, безне кавыштырган радионы бик еш искә алабыз. «Дулкын» миңа киләчәк тормышымны күзалларга ярдәм итте. Радио булмаса телевидениедә эшләп китү җиңел булмас иде. Ул миңа тамашачыны тоярга, тавыш белән идарә итәргә өйрәтте. «Дулкын»да бер дулкында булган күп дуслар таптым. 25 ел узганына ышанып та булмый һаман аралашып, хәбәрләшеп яшибез! «Дулкын» юкка чыкмады! «Дулкын» канат куйган һәрбер шәхес татар милләтенә, сәнгатенә, мәдәниятенә, фәненә хезмәт итә бүген!

Бу минем радиодагы үзем иҗат иткән заставкам иде... Яраткан радиом, хөрмәтле хезмәттәшләрем - бәйрәм белән безне!