|
|
Бүген кемнәр туган
|
|
Архив
|
25.01.2022 Авыл
Авылда ут та, җылылык та юкТукай районы Әҗмәкәй авылы Чаллыдан нибары 11 чакрым ераклыкта урнашкан. Шуңа җәен биредә бакчачылар аеруча күп яши. Кыш көне гомер кичерүчеләр саны 300 ләп. Тик тормыш өчен шартлар гына юк. Авылга һаман газ кермәгән. Шунлыктан йортларны электр белән җылытырга туры килә. Ә декабрь уртасында икенче тапкыр әҗмәкәйлеләр 7 сәгать караңгыда һәм суыкта утырырга мәҗбүр булган. Хәтта кайбер өйләрдә көнкүреш техникасы сафтан чыккан. Яшь балалары булган гаиләләр, нишләргә белмәдек, ди. — Безнең җылылык электрга көйләнгән, — дип сүз башлады Эльвира Газизова. — Җиде сәгать шактый вакыт бит. Ашарга пешерә алмыйсың, суыткыч та эшләми. Шундук җылы киемнәр кидек. Күршеләр, аяклары туңгач, итек киеп йөргән. Әҗмәкәйлеләр беренче тапкыр гына электр энергиясез калмый. Элек тә шәм яктысында утырганнар. Хәзер күпләр килгән зыянны исәпләү белән мәшгуль.
— Атна буе шушы хәл, — ди Әҗмәкәйдә яшәүче Рөстәм Хәмәдуллин. — Бер көнне 2 сәгатькә ут бетсә, хәзер 7 сәгать булмады. Электр техникасы ватыла башлады.
— Утны сүндерүләре булды, скважина насосыбыз янып чыкты, — дип борчуы белән Нурия апа Әхиярова бүлеште. — Аптырагач, яңага алыштырдык. Ә хәзер җылылык казаны эшләми.
Әҗмәкәй авыл җирлеге башлыгы Рамил Адиев биредәге проблемаларны белә. Ләкин аларны чишү миннән генә тормый, ди.
— Подстанцияләр 200 %ка эшли, шунлыктан электр линияләренең көче җитми, — ди авыл җирлеге башлыгы. — Яңа гына өй төзи башлаган кешеләр дә күп. Еш кына 500 кВтлы зур егәрлектәге техника кулланалар. Билгеле, моңа бернинди линия дә чыдамый.
“Челтәр компаниясе”ндә белдерүләренчә, утның бетүе трансформатор подстанциясендәге электр линияләренең тиешеннән артык эшләве белән бәйле. Утны үз белдеге белән кушучылар да бар дип аңлаттылар. Алар шуңа өстәп, ут урлый икән.
— Мондый хәл бүтән кабатланмасын өчен, трансформаторны алыштырырга һәм егәрлеге көчлерәкне куярга кирәк дигән карарга килдек, — ди “Челтәр компаниясе” җәмгыятенең Чаллы филиалы директоры Эдуард Шаронов. — Әгәр кешеләрнең көнкүреш техникасы ут бетү сәбәпле ватылган икән, чыгымнарын каплаячакбыз. Моның өчен аларга “Энергосбыт” оешмасына дәгъва белән мөрәҗәгать итәргә кирәк.
Тукай районы прокуратурасы, Әҗмәкәй авылында берничә тапкыр ут бетү сәбәпле, тикшерү башлаган. Электрдан рөхсәтсез файдаланучыларны ачыклаганнар, аларга карата тиешле чаралар күреләчәк, дип белдерделәр.
Руслан ХӨСНЕТДИНОВ |
Иң күп укылган
|