13.12.2021 Криминал

16 һәм 14 яшьлек укучы кызлар вәхшиләрчә пенсионерны үтергән

Хабаровск краеның Октябрьск авылында 16 һәм 14 яшьлек укучы кызлар вәхшиләрчә пенсионер ирне үтергән. Бу хакта кичә, 12 декабрьдә, билгеле булды. Ахирәтләр, ирнең фатирына кереп, 10 мең акчасын тартып алганнар, аны бик каты кыйнаганнар, фатирда булган бар нәрсәне ватып-җимереп беткәннәр. Ахырда пенсионер өстенә ишек куеп, аның өстендә сикергәннәр.

Соңрак кызлар тавышка чыккан күрше хатынга һөҗүм иткән. Ул көч-хәл белән кызлардан кача һәм полициягә шалтырата.

Вакыйга урынына килеп җиткән полиция хезмәткәрләренә кызлар үтерү белән яный, алар фатирда газ ачабыз һәм күршеләрне үтерәбез дип куркытканнар. Кызларны кулга алганнар, әмма пенсионерн ирне коткара алмыйлар, ул дәваханәдә җан бирә.

60 яшьлек ирне үтерер алдыннан кызлар олы яшьтәге бер хатын белән спиртлы эчемлекләр эчкән.

Кызларның танышлары сүзләренчә, ахирәтләргә ирдән даими килгән сасы ис ошамаган, алар белән аралашучы дус хатынга өргән эте дә ачуларын китергән. Шулай ук ирнең тәртипсез тормыш алып баруы да җинаятьче кызларның ачуларына тигән – пенсионер гел генә эчеп-исереп йөргән. Әмма кызлар моңа кадәр бер дә агрессив булмаган, имеш. Аларның ике начар гадәте булган – тәмәке тарту һәм алкогольле эчемлекләр куллану.

Һәм менә соңгы “яңалык” – пенсионерны тукмап үтергән ахирәтләр шул рәвешле Tik-Tok-тагы аккаунтларын үстерергә теләгән. Бу хакта кызларның берсе белән укыган сыйныфташы Екатерина сөйләгән.

Екатерина кызлар җинаятьне күптән планлаштырган, ди. Ахирәтләрнең берсен ул “башы киткән”, ә икенчесен бер тапкыр гына күргән идем, ди.

Яшьтәшләре кайчандыр бер малайны кыйнаган чакта ул аларга ияреп аны типкәлгән. Екатерина кызда агрессия күп булуын, җитмәсә, ул эчкече әнисе белән яшәп, аның белән бергә алкоголь куллануын сөйли.

Екатерина сүзләренчә, кызлар бу җинаятьне Tik-Tok-та танылыр өчен кылган. Кызларның анда 100ләп подписчиклары бар. Гаепләнүчеләр социаль челтәрләрен актив алып барган, еш кына төрле челленджларда катнашкан.

Коточкыч хәлләр бит... Ниндидер бала чагалар кешегә яшәргәме-юкмы икәнен хәл иткән, бер дә юкка гаепсез кешене үтергәннәр, икенчедән, полиция хезмәткәрләренә үтерү белән янаганнар. Һәм ни өчен? Tik-Tok-та танылыр өчен? Менә хәзер төрмәдә танылырлар инде. Шөкер, икесе дә хөкем ителү яшендә.

Фото:РЕН ТВ каналыннан кадр

Әлфия ШАКИРҖАНОВА
Өмет
№ --- | 13.12.2021