АЙГӨЛ БАРИЕВА: «ТӘМЛЕ АШАРГА ЯРАТАМ»

Айгөл Бариева — Камал театры артисты Шамил Бариевның кызы. Бүген ул татар эстрадасында үз урынын тапкан җырчыларның берсенә әверелде. Ураза бәйрәме көнне аның гаиләсендә кунакта булдым. Бәйрәм хөрмәтенә Айгөл алма пирогы пешерә иде. "Бу пирогны улым Камил бик ярата, аның заказы буенча пешерәм," — диде әни кеше. Хуҗабикә кухняда кайнашкан арада аңа сораулар яудырдым.

— Айгөл, ашарга пешерергә кайчан өйрәндең?

— Яши-яши. Кечкенә вакытта әни әзерләгәнне карап тора идем, ләкин ул ми­не ризык пешерергә өй­рәт­мәде. Өйрәнерсең әле, дия иде.

Кияүгә чыккач, тәүге тапкыр пылау пешерергә уйладым. Дөгесен күп салып таш­лаганмын, билгеле, ул пеш­мәде. Ирем Линар алдында хур булдым. Шуннан әнигә хат (ул вакытта без Себердә яши идек) яздым. Ул шактый ризыкларның рецептын өйрәтеп җавап хаты җибәрде. Пылау хәзер гаиләбезнең иң яраткан ризыгы (елмая).

— Өч көн эчендә кияүгә чыккансың дип ишеттем.

— 1997 елның 1 ноябрендә Линар белән таныштык, 2сендә ул миңа тәкъдим ясады, 3есе  ризалык бирдем.

— Нишләп шулай бик тиз?

— Аның яхшы кеше икәнен күңелем сизде. 20 ноябрьдә никах булды һәм без Себергә яшәргә киттек. Ул вакытта ирем хәрби иде, хәзер Казанда үз фирмасы бар.

— Балаларыгызга ничә яшь?

— Айлинә — II, Камил I сыйныфта укый. Кызыбызга исемне үзебез уйлап таптык. Айгөл һәм Линардан алып куштык. Төрки халыкларда ул бик популяр исем икән.

— Сезнең гаиләдә күб­рәк нинди ашларга өстенлек бирелә?

— Татар халык ашларына. Итсез ризык пешергәнем юк. Голубцыны үзенчәлекле итеп әзерлим. Кәбестә яфракларын бер минутка кайнар суга тыгып алам да, дөге кушылган фаршны төрәм. Шуннан аның ике ягын да тугланган йомыркага манып, бераз үсемлек маенда кыздырам. Икенче савытта соус ясыйм. Кишер, помидор, суган, сарымсакны вак итеп турыйм. Томат пастасы салып, яшелчәләрне үсемлек маенда кыздырып алам. Соңыннан голубцылар өсте­нә соусны агызам да, сүрән утта пешерәм. Ул бик тәмле була.

Иң яраткан ризыгым — бәлеш. Авылга кайткач, бөтен килеш бәрәңге пешереп, кисәкле ит, яшел суган белән ашарга яратам. Талымлы түгелмен, элек ашханәдә туклану ошый иде. Линар исә фасоль, гөмбәле ризыкларны үз итә. Айлинә шоколадтан, Камил казылыктан башка тора алмый. Шуңа күрә безнең суыткычта алар һәрвакыт бар.

— Ашарга пешергәндә Айлинә сиңа булышамы?

— Әле иртә, өлгерер.  

— Иртән торгач, нәрсә ашыйсыз?

— Эш көнендә йогырт кебек җиңелчә ризык, ә ял көн­не ботка пешерәм.

— Ураза тоттыңмы?

— Узган ел ай дәвамында ураза тоткан идем, быел 8 генә көн тота алдым. Авыр­дым. Ел саен Рамазан аенда авыз ачтырам. Туганыбыз Наҗия абыстай килеп Коръән укый.

— Бүген иртән торып таба исе чыгардыңмы?

— Әйе, коймак пешердем. Хәзер иремнең әти-әнисен бәйрәм белән котлап кайтабыз. Каенанам пәрәмәч пешергән.

— Диета тотасыңмы?

— Юк, нәселдә таза кеше­ләр булмагач, симерү куркынычы янамас дип ышанам. Ашауда үземне чикләмим. Тәмле ашарга яратам.

— Айгөл, Дәүләт Советы рәисе Фәрит Мөхәм­мәтшин белән дуэт җырладың. Бер табын артына утырып ашаганыгыз юк­мы?

— Бар. Бер мәҗлестә ка­ра-каршы утырырга туры килде. Ул хатыны Луиза ханым белән иде. Фәрит Хәйруллович табын артында үзен бик гади тота. Эчке киеренкелекне юкка чыгара белә.

— Түрәләр янында ашап булмыйдыр ул?

— Тамагым ачса, ашыйм анысы. Ләкин андый җирдә үзеңне бик тыйнак тотарга кирәк. Әти-әнием интеллигентлар иде, алар миңа яхшы тәрбия бирде. Безнең өйдә сәнгать кешеләре еш кунак булды, әнием аларны гел ачык йөз, тәмле сый белән каршы алды. Мин шуны күреп үстем.

19 яшемнән чит илгә йөри башладым. “Хыял”, “Сорнай” ансамбле белән Финляндия, Италия, Төркия, Австрия, Германия, Швейцариядә чыгыш ясарга туры килде. Без­нең ил өчен ят, яңалык булып күренгән нәрсәләргә шунда баргач өйрәндем. Финляндиядә ике атна буе ак кофта киеп йөрдем, якасы пычранмады. Асфальтны сабын белән юганнарын күреп шаккаткан идем. Андагы тормыш әкияттәге кебек. Культура да башка.

Айгөл гаиләсе белән әти-әнисе яшәгән фатирда тора. Ли­нар анда үзенчәлекле итеп ремонт ясаган. Бер як стена фотолар белән тулган.

Алма пирогы пешкәч, түгәрәк табын артына җыр­чының гаиләсе җыелды. Линар бик итагатьле, хатынының зур киңәшчесе.

— Өйләнешеп 4 ай узуга, әнием үлеп китте. Шул вакытта янымда Линар бул­маса, ул кайгыны күтә­рә алыр идем микән, белмим. Күңелемә авыр, ямансу вакытта гел ирем белән сөйләшәм. Бер-беребездән яшерен серләр юк, — диде Айгөл.