Бүген Россиядә блог көнен билгеләп үтәләр. Ә "Блогер.Татар" бәйгесенә эшләр кабул итүнең соңгы көне

Бүген Татарстан Республикасы Президенты каршындагы Татар телен саклау һәм үстерү мәсьәләләре комиссиясе белән «Матбугат.ру» порталы авылларга багышланган бәйгегә гариза бирү өчен соңгы көн. «Күңелгә хуш авылым» шигаре астында узучы бәйгедә катнашырга ашыгыгыз!

Бәйгедә жюри тарафыннан 10 җиңүче билгеләнәчәк. «Иң яхшы авыл аккаунты» номинациясендә – 20000 сумнан акчалата 5 бүләк, «Авыл турында иң яхшы пост» номинациясендә – 20000 сумнан акчалата 5 бүләк.

Шулай итеп, приз фонды - 200000 сумны тәшкил итәчәк. Бәйгедә үз авыллары турында татарча блог алып баручы 16 яшьтән өлкән кешеләр катнаша ала. Блогка язылучылар саны буенча чикләүләр юк. Эшләрнең кызыклы, үзенчәлекле булуы, техник яктан яхшы башкарылышы, аудиториянең активлыгы исәпкә алыначак. Татар теленең камиллеге дә мөһим.

Бәйгедә катнашу өчен исем-фамилиягезне, телефоныгызны һәм блог яисә постка сылтаманы bloger.tatar@mail.ru электрон адресына җибәрергә кирәк.

Шуны да искәртәбез, бу бәйгедә җиңү яулар өчен блогер булу мәҗбүри түгел. Авылыгыз аккаунтын да алып бармыйсыздыр, бәлки. Нибары 1 (!) пост белән әлеге бәйгедә 20 000 сум отарга мөмкин. Төп шарт - ул пост татарча һәм авыл турында булсын.

Эшләр 31 августка кадәр кабул ителә. Җиңүчеләр 10 сентябрьдә игълан ителәчәк. Тулырак мәгълүмат «Блогер.Татар» сайтында һәм @bloger.tatar инстаграмында.