Салават Фәтхетдинов ике елга якын сузылган «тәнәфес»тән соң: «Ниһаять, мин әзер»

Җырчы да, исәнләшкәндә, хәл-әхвәл белешкәндә, «Мин – эшсез» дигән гыйбарәне кулланышка алды һәм менә ике елга якын сузылган «тәнәфес»тән соң, күнегелгән гадәт, тупланган тәҗрибә буенча, нәкъ менә август аенда, нәкъ менә Камал театры сәхнәсендә яңа сезонга нигез салына. Репетицияләр дә җырчы иҗатының беренче елларында шаулап-гөрләп торган офиста барды һәм бара. Барысы да элеккечә кебек: Салават белән кырык елга якын инде иҗади дуслыкта булган композитор, баянчы, почти яшьтәше Альфред Якшимбетов, шулай ук якын дуслары – иҗатташлары Фирзәр Мортазин, Ядкәр Хәбибуллин, Илфат Шәехов, Таһир Хәмзин һ.б. үз урыннарында. Репертуарга алыначак  җырлар турында никадәр генә бәхәсләшсәләр дә, азагы уртак фикергә килү белән төгәлләнә: быелгы сезонда уннан артык иң яңа җыр башкаручыларны – Салаватны һәм баянчыларны әсир иткән кебек, тамашачыны да битараф калдырмас.

 

Әлбәттә, тормыш үзгәрә, коллектив та яшь талантлар белән елдан-ел байый. Шундыйларның берсе – Делюс Шәйхразиев белән серләшеп-фикерләшеп алдык. Казанда мәдәният-сәнгать югары уку йортын тәмамлаган Сарман егете ул. Тормышка, яшәешкә үз карашы, фикерләре саллы, дәлилле, татар, чит илләр классикасын да яратып укуын ассызыклады, таланты исә, хезмәттәшләре әйтүенчә, әлбәттә инде, сарманлыларга хас. Салават труппасында – композитор-аранжировкалаучы, һәм шул рәвешле халкыбызга хезмәт итүе белән бәхетле.

 

Яңа сезонга әзерләнгән көннәрдә Салават берникадәр вакытын улы Рөстәм белән Чечнядә уздырды. «Әтием – тренерым да, хөкемдарым да», – дип әйтергә ярата алты яшендә баггига утырган, багги классында биш тапкыр Татарстан чемпионы, 14 яшендә Россия чемпионы булган Рөстәм. Салават исә: «Ярышларда нинди очракта нинди гамәл кылырга кирәклеген улым үзе яхшы белә, – дигән фикердә. – Мин аңа: «Ярышта иң мөһиме – җиңү!» – дип язылган букча бүләк иттем. Ярышка, мин җиңәчәкмен, мин җиңәргә тиеш, дип чыгарга кирәк».

 

Чечня командасы составында чыгыш ясаган Рөстәм финишка беренче булып килә, гомумкоманда да беренчелекне ала. Чечня Республикасы башлыгы Рамзан Кадыров, Татарстан егетенең уңышларын бәяләп: «Мин кадерле туганыбызны шәхсән котлыйм», – ди. Команданы тагын дүрт этап көтә. Алары Мәскәүдә, Казан, Грозный, Сочида узачак.

 

Менә шундый куанычлы мизгелләргә бүленеп алган Салават, кайтуга ук репетицияләргә чумды, төн уртасына кадәр җыр өйрәнгән, тамашачыга сәхнәдән нинди фикер җиткерергә кирәклеген ачыклаган көннәре дә еш булды, социаль челтәрләрдәге фикерләрне дә тупладылар. Җыр сәнгатен үстерүгә зур өлеш керткән шәхесләребезне искә алып, концертның берникадәр өлешен аларга багышлау теләге шуннан барлыкка килде.

 

Салават концертларында җыр дөньясындагы йолдызларыбызны кунакка, ягъни сәхнәдә чыгыш ясарга чакыруны гадәткә кертте. Инде исемлек билгеле, таләпләр җиткерелгән, быел һәр көн саен бер кунак чыгыш ясар, дип көтелә. Салават та: «Ниһаять, мин үзем дә әзер», – дип белдерде. «Ниһаять» сүзенә басым ясап, мәгънә салып әйтте. Әйе, тормыш хәере белән ипләп кенә үз агымына кайта.