Өч дус суга баткан малайны коткарганнар

Июль көнне  3 санлы мәктәптә белем алучы 5 сыйныф укучылары, өч дус  – Дмитрий Филатов, Арслан Казбулатов  һәм  Максим Скулкин елгада су кергәннәр. Бермәл  малайлар ярдан ярдәм сорап кычкыруны ишеткәннәр һәм бер малайның су астына китүен күргәннәр. Бер баткан, бер калккан малайның кулы гына күзгә чалына. Өч дус аптырап калмый, шунда ук ярдәмгә ташланалар. Суга чумып, батучыны өскә этә башлыйлар.

 

“Су кергән вакытта без ярдан ярдәм сорап кычкыруларын ишеттек, – малайлар бер-берсен бүлдерә-бүлдерә сөйлиләр, – һәм батучыны күрдек. Аның янына тизрәк ашыктык. Арслан, тирәнгәрәк чумып, аягын суүсемнәреннән арындырып, аны өскә этә башлады, Максим чәчләреннән тартты, Дима кулыннан сөйрәде. Шулай итеп, өчәү бергә аны су өстенә чыгардык. Шунда ук безгә ярдәмгә өлкәннәр килде. Ярга малайны алар алып чыкты”.

 

Республиканың Гадәттән тыш хәлләр министрлыгы малайларны бүләкләү турында кайгырта.

Фото:02.mchs.gov.ru

Чыганак: bashinform.ru