Татарстан китап нәшрияты «Кызыл мәйдан» китап фестивалендә уңышлы катнашып кайтты

17–20 июнь көннәрендә Татарстан китап нәшрияты «Кызыл мәйдан» 7 нче китап фестивалендә катнашты. Бу көннәрдә нәшрият стендында китап укучылар күп булды.

Китап сөючеләр балалар китапларын һәм матур әдәбиятны бик теләп сатып алдылар, шулай ук тарихи басмаларга, татар әдәбияты классикларының һәм яшь авторларның китапларына ихтыяҗ зур булды. «Татарстан китап нәшрияты» стендын Татарстан Республикасының Россия Федерациясендәге тулы вәкаләтле вәкиле Равил Әхмәтшин карады. Нәшриятның генераль директоры Илдар Сәгъдәтшин аңа Мәскәү укучысына алып килгән басмалар турында сөйләде һәм яңа китаплар белән таныштырды.

ГУМның демонстрацион залында узган «2020 елның иң яхшы китабы» конкурсы җиңүчеләрен бүләкләү тантанасы китап фестиваленең әһәмиятле вакыйгасы булды. Әлеге конкурста «Татарское народное декоративное искусство (XVIII – начало XXв.). Истоки и традиции» китабы (авторы Ф. Х. Вәлиев) «Лучшее издание в российских регионах» номинациясендә дипломант исемен алып кайтты.

Россия китап бастыручылары ассоциациясенең (АСКИ) юбилей конкурсында 2021 елның гыйнвар-апрель айларында илнең 46 төбәгеннән 120ләп нәшрияттан 500 дән артык басма катнашкан. Бу – безнең илдәге иң югары дәрәҗәгә ия китапчылар конкурсы. Конкурсның 13 тематик номинациясе буенча эксперт советлары бер айга якын эшләде, аларга абруйлы белгечләр – галимнәр, укытучылар, нәширләр, китапханәчеләр, китап пропагандистлары керә. Дипломантларының күбесе илебезнең китап басу тенденцияләре, иске брендларның юкка чыгуы һәм яңа брендларның барлыкка килүе, нәшрият мәктәпләренең һәм стильләрнең үсеше турында сөйли ала.

Аннан тыш, «Иң яхшы региональ басма» бәйгесенә дә йомгак ясалды, анда Татарстан китап нәшриятының ике китабы җиңүче булды: Габдулла Тукайның 3 телдә басылган сайланма әсәрләре һәм Ф. Х. Вәлиевнең «Татарское народное декоративное искусство (XVIII – начало XXв.) Истоки и традиции» китабы.