Марсель Вәгыйзов тәүге концертына чакыра (ВИДЕО)

Быелгы концерт сезоны яшь җырчыларның беренче “сольник”лары белән башланып китте. 30-31 октябрьдә Марсель Вәгыйзов та Казан тамашачысына концерт программасын тәкъдим итәчәк, ул “Җырларымда – уйларым” дип исемләнә.

- Марсель, белүемчә син Венера Ганиеваның укучысы.

- Әйе, мин Мәдәният һәм сәнгать университетында Венера Әхәтовна классында белем алдым. Әлеге уку йортын 2005 елда тәмамладым. Соңгы елларда төрле бәйгеләрдә катнаштым. Илһам Шакиров, Рәшит Ваһапов, Салих Сәйдәшев исемендәге, “Татар моңы-2010” Халыкара конкурслар лауреатымын.

- Концерт оештыру җиңел түгел, бигрәк тә яшь җырчыларга. Ә син куркып тормагансың, ике көн концерт бирәсең.

- Һәрбер җырчы өчен сольный концерт кую иң зур хыялларның берседер, минемчә. Минем дә күптәнге теләгем ул. Менә быел, ниһаять, шушы хыялымны тормышка ашырырга иде исәп. Аны оештырганда әллә ни кыенлыклар туды дип әйтмәс идем, чөнки дусларымның күп булуын аңладым, алар ярдәм иттеләр. Иҗатымны хөрмәт итүчеләрнең дә шактый икәнлеген белдем. Бик сөенеп йөргән көннәрем. Алла бирса, Казанның Филармония концерт залында әйбәт кенә  чыгыш ясарбыз дип өметләнәм.

- Анда кемнәр катнашачак?

- Концертыма якташларым Венера Ганиева, Рәсим Низамов, Фәрит Хатыйповны чакырдым, аларга ихтирамым бик зур. Шулай ук авылдашым Фәридә Минһаҗева катнашачак, ул быел “Йолдызлык-Созвездие” конкурсында юмор әсәрен сөйләү буенча җиңү яулаган кызчык. Яшь җырчы Айгөл Шәйхетдинова да җырлаячак. Сәхнәдә эстрада җырлары да, халык җырлары да яңгыраячак, Венера Ганиева белән операдан дуэт җырлачакбыз, Рәсим Низамов белән дә дуэт башкарырбыз. Концертны Алмаз Хәмзин белән Фердинанд Хафизов алып бара.

- Залда якыннарың, дусларың, теләчелеләр күпләп җыелып, синең өчен куанып, көч биреп  утырсыннар, без дә уңышлар телибез сиңа!

- Бик зур рәхмәт! 30 һәм 31 октябрьдә булачак концертыма рәхим итегез!