XVII Казан мөселман киносы фестивален уздыру мәйданнары билгеләнде

5-10 сентябрьдә Татарстан башкаласында XVII Казан халыкара мөселман киносы фестивале узачак. Мөселман киносы фестивален ачу тантанасы 5 сентябрьдә Казан Ратушасында узачак, тантаналы ябылу 10 сентябрь көнне "Пирамида" мәдәни-күңел ачу комплексында үтәчәк.

“Матбугат.ру”га билгеле булганча, чараларда кызыл келәм юлы буйлап узучы атаклы артистлар катнашачак. Фестивальдә катнашучы фильмнар «Родина» һәм «Мир» кинотеатрларында күрсәтеләчәк. Фестиваль кысаларында шәһәрнең төрле мәйданчыкларында шулай ук иҗади очрашулар, түгәрәк өстәлләр, матбугат конференцияләре, кинофестивальләр һәм башка чаралар оештырылачак.

Исегезгә төшерәбез, XVII Казан халыкара мөселман киносы фестиваленә гаризалар кабул итү 2021 елның 1 февралендә башланды һәм 1 июньгә кадәр дәвам итәчәк. Быел казах кино белгече Гөлнара Абикеева җитәкләгән сайлау комиссиясе үз эшен июль башына тәмамлый, шуннан соң конкурс программасы игълан ителәчәк.

Төп программадан тыш, тамашачыларны параллель программа да көтә. Монда уен, документаль, анимацион кино, ретроспектив һәм тематик программаларның иң яхшы үрнәкләре тәкъдим ителәчәк.