ЧОП ТҮГЕЛ, ЧҮП СИН!

(Уены-чыны бергә)

- Туктагыз! Кем янына?

- Исәнмесез! Гали Вәлиевич янына үтсәм ярыймы?

- Гали Вәлиевич әле килеп җитмәде.

- Ул әле генә үзеннән шалтыратты. Мине 9.00 сәгатькә көтә.

- Документыгыз бармы?

- Юк.

- Ничек алай? Кешенең документы булырга тиеш. Ә, бәлки, сез террористтыр?

- Ә, менә, права бар икән.

- Права ярамый. Берәр нәрсә урласагыз, ГАИдан эзлим мени сезне!

- Менә эш таныклыгы бар.

- Нинди оешманыкы бу? Мин андыйны ишеткәнем юк. Әгәр берәр кешене үтереп чыгып китсәгез, мин нишләргә тиеш? Монда бит отдел кадров телефоны язылмаган!

- Менә паспорт та бар икән.

- Фотосы охшамаган.

- Яшьрәк чакта тәшкән идем.

- Сумкагызны ачып күрсәтегез. Ә, бәлки, сез бомба куярга керәсездер!

- Менә карагыз.

- Нәрсә бу?

- Ноутбук.

- Ярамый. Нәрсәгә ул? Берәр информация урламакчы буласыз мәллә?

- Ә бу нәрсә?

- Фотоаппарат.

- Безнең бинаны төшерергә ярамый!

- Минем телефон да фотога төшерә ала...

- Башта Гали Вәлиечнең үзенә шалтыратыгыз. Бәлки, сез аның башына җитәргә килгәнсездер!

- Әйтәм бит, әле генә шалтыраттым, ул мине көтә.

- Кәрәзледән түгел, внутреннийдан шалтыратыгыз.

- Нинди номер буенча?

- Каян белим, әнә бит справочник ята.

- Монда күренми аның исеме.

- Ул иске справочник. Менә яңасы.

- Шалтыратам. “Занят” күрсәтә.

- Димәк, телефоннан сөйләшә.

- Алай икән.

- Соңрак шалтыратыгыз.

- Рәхмәт инде. Ә сез үзегез кем соң?

- Ничек инде? Охрана мин!

- Нинди охрана?

- ЧОП!

- Рәхмәт инде, кереп тормыйм. Гали Вәлиевич унынчы яртыга кадәр генә булам дигән иде...