«Бар дөньямның асты-өскә килгәндәй булды. Сабыема карап бер шатлансам, ун елый идем»

– Хәзер язмышым белә килештем инде мин. Башта бик авыр булды. Кая барып бәрелергә, кемнән киңәш сорарга белмәдем. Бар дөньямның асты-өскә килгәндәй булды. Сабыема карап бер шатлансам, ун елый идем, – ди искә ала әнисе Лилия. – Йөкле вакытта берничә тапкыр хастаханәдә ятып чыктым. Ул чакта балагызның йөрәк тибеше начар дигәннәр иде. Мин моңа әллә ни игътибар итмәдем. Ә менә табар вакытым җиткәч, суым китте. Табиблар башта үземә таптырмакчы иде, аннары инде кесарь кисеме ясадылар. Баламның хәлен 1 баллык дип бәяләделәр. Ул чакта улымны Казанга җибәрергә тиеш булганнар. Нигәдер район табиблары үзләрендә калдырды. Туганда кислород җитмәгән, шуңа баш мие күзәнәкләре зыян күргән, диләр. Ул чакта яшь идем, миңа төпле киңәш бирүче табиблар да булмады. Бары тик елатмаска гына куштылар.

 

Күңелләренә шик кергән әти белән әни сабыйларын башка табибларга да күрсәтәләр. Алары исә, сабыйны 3 яшькә кадәр дәваларга киңәш итә. Ул вакыттан бирле 4 ел узып киткән. Сабыйны әти-әнисе төрле тернәкләндерү үзәкләренә йөртә икән. Дәваланулар да бушка китми. Уллары күзгә күренеп уңайлана башлый. Рияз әкренләп утырырга өйрәнгән, басып та тора ала.

 

– Балам белән күп кенә хастаханәләрдә дәваланырга туры килде. Эчмәгән дару, кадатмаган укол калмады. Күзләренә зыян килмәсен өчен дип тырыштык. Аллага шөкер, балама карап сөенеп туя алмыйм. Тырышлык бушка китмәде, үзгәрешләр күп. Әмма әле дә сабыем эпилепсия өянәгеннән интегә, – ди Лилия.

 

Рияз утырырга өйрәнсә дә, аңа һәрвакыт ярдәм кирәк. Гәүдәсен дөрес итеп тоткан очракта гына аягына басарга, йөрергә була. Тик моның өчен махсус җайланма кирәк. Риязның гәүдәсенә туры килә торган вертикализатор 144 мең сум тора икән.

 

– Моңа кадәр  улыбызга кирәкле җиһазларны үзебез алырга тырыша идек. Әмма бала тиз үсә. Ә буе үскән саен, җайланманы үзгәртергә кирәк. Шуңа да мәрхәмәтле кешеләрдән ярдәм сорарга булдык. Булышсагыз иде, – ди Лилия.