Гөлсирин яратып пешерә торган ”челтәрле” коймак РЕЦЕПТЫ

Бүген хуҗабикәләр игътибарына Гөлсирин Абдуллина яратып пешерә торган ”челтәрле” коймаклар рецептын тәкъдим итәбез. Телегезне йотарлык тәмле булалар, ди җырчы.

Нәрсәләр кирәк булачак:
1,5 стакан он, 3 йомырка, 250 мл кайнаган су, 2 стаканга якын кефир, 1 аш кашыгы шикәр, ¼ чәй кашыгы тоз, бер чеметем генә (1/3 чәй кашыгы) сода, 2 аш кашыгы үсемлек мае, 50 гр атланмай
⠀
Шулай итеп, башлыйбыз! Онны зур савытка саласы, шикәр, тоз, сода өстәп, барысын бергә болгатырга. Кефирны йомырка белән аерым савытта тугларга, бераз күпертергә кирәк.
⠀
Аннан соң аларны онлы массага бушатырга, миксер белән яхшылап болгатырга. Бер стакан кайнар су һәм үсемлек мае да өстисе. Соңрак һәммәсен дә болгатып, куе булмаган камыр әзерлибез.
⠀
Табаны майлыйбыз һәм коймакларны кыздыра башлыйбыз. Камырны юка итеп салырга тырышыгыз. Беренче коймакны пешергәндә майларга кирәк, калганнарын коры табада гына. Юка, авызда эри торган тәмле һәм челтәрле коймаклар әзер!