ЮЛЛАР ОЗЫНЛЫГЫ КУРКЫТМЫЙ, РУХ ЯРЛЫЛЫГЫ САГАЙТА

Гастроль Сибай шәһәреннән башланды. Биредә шәһәр көненә юлыктык, зал тулы тамашачы, чәчәк, алкышлар, Сибай театры артистлары җыелып килгән – бар да бик матур булды.

Икенче көнне Чиләбе өлкәсенә юл алдык. Анда Магнитогорск, Чиләбе, Югары Уфалы, Озёрск, Златоуст, Миасс, Сатка, Усть-Катав шәһәрләрендә, Метлино, Конашак бистәләрендә уйнадык. Һәр көн яңа урын, шәһәрләр дә төрлечә, ә тамашачыларның сагынулары һәр кайда бер төрле икән. Чиләбе шәһәрендә укытучы ханым 150 км.дагы авылдан укучыларын спектакль карарга алып килгән. Аларның театрга сусаганын, безгә мөкиббән китеп карауларын күрү онытылмаслык вакыйга булды. Тел, уен-җырны йотылып тыңлыйлар. Залда, кулъяулыкларын тотып, күпчелек әби-бабайлар утыра, балаларын ияртеп килгән яшь әти-әниләр (аз булса да) күренгәли, ә өлкән буын белән яшь буын арасындагы урта буын юк (социализмның бишьеллыклары арасында эреп югалгандыр инде алары). Чиләбе, Конашак, Усть-Катавтагылар рәхәтләнеп безгә кушылып җырлады, юктан да мәзәк тәм табып чын күңелдән көлде. Андый тамашачыларга уйнау үзе бер рәхәт. Кайбер җирләрдә 20-25 ел спектакль булмаган икән, башта “болар кемнәр икән, татар рухы бармы боларда дип” сак кына утыралар. Соңыннан шуларның спектакльгә кереп китеп, күңелләре булуын, рәхмәтләр әйтеп кайтып китүен күрү үзе бер дулкынлану булды.

Ул якларның тимере генә түгел таулары, табигате дә җәлеп иткәндер безнең милләттәшләрне. Матурлык гаҗәеп! Күчеп йөргәч вакыт безгә алай хозурланырга ирек бирмәде, шулай да иртән дүрттә торып Злотоустның Таганай тавына үрмәләрлек көч таптык. Андагы күлләр, тауларга карап, ял итәргә килергә дип кызыгып кайттык. Һәркайда безне Татар Конгрессының вәкилләре озатып йөрде, аларның күңел җылысын тою зур милләт корабында фикердәшләребез булуы безгә ныклык, рәхәтлек бирде.

Юллар, юллар,

Озын булса булсын,

Тик соңгысы гына булмасын!