ТАТАР ИСЕМЕНӘ НИ ҖИТМИ?

Балага исем кушу бик авыр һәм шул ук вакытта җаваплы эш. Ник дигәндә, ата-ана балага исем кушканда, баласының исемен генә түгел, ә аның язмышын да билгели. Чынлап та, кешенең исеме аның язмышына бик нык тәэсир итә.

Бервакыт инде азмы-күпме гомер яшәгән дигәндәй, бер танышым исемен үзгәртте. Шушы вакыйгадан соң аның бөтен тормышы асты өскә килде, акыл ягыннан зәгыйфьләнде. Моны яңа исемнең йогынтысы белән аңлаттылар. Шуңа күрә яңа туган балага исем кушканда бик игътибарлы булырга кирәк.

Узган атнада Казанда 358 бала туган, шуларның 191е — малай, 167се — кыз бала. Сабыйларга нигездә Илья, Артем, Ислам, Адель, Кира, Милана, Дарья кебек исемнәр кушканнар. Иң еш очрый торган исемнәр арасында Муса, Мирон, Расул, Богдан, Ойша, Зилә, Марият, Златислава исемнәре бар. Игътибар иткәнсездер, соңгы елларда татарлар борынгы, иске исемнәргә өстенлек бирә башлады. Әйтик, Мәрьям, Зөләйха, Галиябану, Илһам, Камил, Нурия, Әмир, Мәдинә һәм башкалар.

Ә менә бер туганым татар халкының борынгы исемнәренә дә, заманча исемнәренә дә мөрәҗәгать итмәде. Эш шунда, алар тормыш иптәше белән ир бала көтәләр. Мин — үтә дә кызыксынучан кеше һаман саен «Кем дип кушасыз соң?», дип төпчендем. Һәм көннәрдән бер көнне, ниһаять, җавап та килеп иреште. «Улыбызга бик озак исем уйладык. Инде Эдуард, Адель, Даниель, Аскар исемнәре дә калмады. Шулай итеп, озак кына уйлаганнан соң, Ролан дип кушарга булдык, чөнки исемне фамилиягә дә, әтисенең исеменә дә туры китереп эзләдек. Токмаков Ролан Васильевич! Шәп бит!», - дип сөйләде Гөлназ.

Булачак әни бу исемне интернеттан тапкан. Аның әйтүенчә, Ролан исеме мәрхәмәтле, максатчан дигәнне белдерә. Ә минем исә Ролан дигәч, күз алдына бөек француз язучысы Ромен Ролан килеп басты. Аның атаклы «Кола Брюньон», «Очарованная душа» әсәрләрен укыганны хәтерлим. Кем белә бит, бәлки тиздән якты дөньяга аваз салачак Ролан да үсеп җиткәч мәшһүр язучы булыр, иншалла!