«Өебез шырпы сыман янып бетте...»

Садриевлар могҗиза белән генә исән калганнар, хәзер алар үзләре ярдәмгә мохтаҗ. Садриевлар гаиләсенең йорты янып беткән. 

 

Буа районы Кайбыч авылында 3 декабрь көнне кичке җиделәрдә зур янгын чыга. Залда чыккан ут телләре тиз арада өч бүлмәне дә камап ала.

 

- Ике оныгым белән балалар бүлмәсендә телевизор карап утыра, ә әбиебез аш бүлмәсендә кичке аш әзерләү белән мәшгуль иде. Биш яшьлек оныным йөгереп керде дә, бабай, залда нидер яктырып китте, диде, бирегә керсәм, электр чыбыгы яна, ут диванга күчкән. Мин утны сүндерергә керештем. Ә хатыным Мөгазимә ярдәм сорап күршеләргә чапты. Санаулы минутлар эчендә ут бөтен өйне камап алды. Агач йорт шырпы сыман янып бетте, - дип сөйли Айдар абый.

 

Олы яшьтәге Айдар абый белән Мөгазимә апа кышкы суыкта бер кат кием белән урамда утырып калалар. Хәзер алар туганнарының өендә яшәп торалар. Оныкларын Мәскәү өлкәсендә яшәүче киленнәре үз янына алып киткән. Ә авыл халкы исә янгыннан зыян күргән гаиләгә ярдәм итү йөзеннән акча җыюга керешкән. 

 

- Янгынның нидән чыкканлыгы әлегә билгесез, беренчел мәгьлүматларга караганда, күрәсең, электр чыбыклары төзексез булган, - дип сөйләде безгә авылда китапханәче булып эшләүче Садриевларның күршесе  Рүзинә апа Закирова, -  Янгында аларның бар акчалары, документлары янып беткән. Янгын сүңдерүчеләр бу йортта яшәп булмый, төзекләндереп тә булмаячак ,диделәр. Ә Айдар абый белән Мөгазимә апаның чит өйдә яшиселәре килми, янәдән үз нигезләрендә кечкенә генә булса да бер өй төзү турында хыяллана. Тамчыдан күл җыела, диләр бит, шөкер, авыл халкы да, тирә-як авылларда яшәүчеләр, җирле һәм район үзәгендәге мәчет тә Садриевларга акча җыюда ярдәм итә. Бик күп кием җыелды. Халкыбыз шундый кайгы килгән вакытта, чын йөрәктән ярдәм кулы сузды. Банкта да исәп-хисап счеты ачтык. 

 

Кышка кергәч йортсыз, җирсез калган Айдар абый белән Мөгазимә апа Садриевларга ярдәм итәргә теләүчеләр өчен реквизитлар калдырабыз. Ут-күздән Ходай сакласын.

 

Сбербанк картасы: 4817 7600 5676 6094 (күршеләре Рүзинә Рәшит кызы Закирова исемендә) һәм аның телефон номеры +7927 410-72-32.