Рифат Фәттахов: “Атик Алига Финляндиянең югары дәүләт бүләге бирелүе – татар халкы өчен зур дәрәҗә!”

Финляндиядә яшәүче күренекле милләттәшебез Атик Али бу илнең югары дәүләт бүләгенә – Арслан орденына лаек булды. Ул – Финляндиянең мәшһүр шәхесләре Абдулла һәм Өлкән Алиларның улы. Әти-әнисе кебек, Атик та гомере буе Финляндиядә татарны татар итеп саклап калуга зур көч куя.

Ул – озак еллар Финляндия татарларының Исламия җәмгыятенең рәисе иде, бүген дә аның эшендә актив катнаша. Шуның өстенә Атик әфәнде – Финляндия мөселманнарын берләштерүче иҗтимагый оешма җитәкчесе.

“Без Атик Али белән без – 31 ел инде таныш, дус, хезмәттәш, фикердәш. Ваһапов фестивале белән дә тыгыз элемтәдә тора ул. Татарстан-Финляндия иҗтимагый, икътисади, мәдәни багланышларын үстерүдә аның өлеше зур. Атик Алига Финляндия Президенты тарафыннан югары дәүләт бүләге бирелүе – зур дәрәҗә. Аның үзе өчен дә, Финляндия татарлары өчен дә, барлык татар халкы өчен дә! Афәрин! Котлыйбыз!”, дип белдерде Ваһапов фестивале җитәкчесе Рифат Фәттәхов.