Казанда үзбәк киносы көннәре башлана (ПРОГРАММА)

4-6 декабрь көннәрендә Казанда үзбәк киносы көннәре үтәчәк. 4 декабрьдә 18.30 сәгатьтә чараның тантаналы ачылышы була. Анда тамашачыларга чын вакыйгаларга нигезләнгән «Сто один» фильмы тәкъдим ителә.

Фильм Әнвәр Иргашев белән Юлия Медведовскаяның шул ук исемдәге романы буенча төшерелгән. «101» — ул серле фактлар һәм 101нче үзбәк героеның батырлыгы турындагы фильм.

5 декабрь көнне 18.00 сәгатьтә исә Татарстан һәм Үзбәкстан кинематографистлары Зифа Кадыйрованың «Сагынырсың — мин булмам» әсәре буенча төшергән «Сөмбел» фильмының премьерасы була.

Чарада Үзбәкстаннан килгән кунаклар — фильмның продюсеры Улугбәк Абдуллаев һәм төп героинясы Сабина Асанова да катнашыр дип көтелә.

Картина сюжеты буенча Сөмбел һәм Булат бер-берсенә гашыйк була, аларның баласы туа. Әмма Булат аларның хисләренә хыянәт итә. Сөмбел аны гафу итә алмый һәм нәни улын алып, Бохарага туганнары янына китә…

«Без Татарстан киносы көннәре кысаларында «Сөмбел» фильмын күрсәттек. Аны бик җылы каршы алдылар. Хәзер без Татарстанда да, Үзбәкстанда да, Россия төбәкләрендә дә «Сөмбел»не күрсәтү өчен прокат таныклыгын рәсмиләштерү белән шөгыльләнәбез», дип хәбәр итте «Татаркино» оешмасы җитәкчесе һәм фильмның продюсеры Миләүшә Айтуганова.

6 декабрьдә 18.00 сәгатьтә Илхом Мөхәммәдиброхимовның «Полет» фильмы күрсәтеләчәк. Драма картинасында вакыйгалар хронологиясен төзергә һәм үзен хөкем иткән җинаять сәбәбен аңларга, фаҗигадә гаепле кешене ачыкларга тырышучы герой турында сөйлиләр.

Казанда үзбәк киносы көннәре кысаларындагы чараларның барсы да «Мир» кинотеатрында үтәчәк.