Яшь тамашачы театры сезонның икенче премьерасын тәкъдим итте (ФОТО)

Г.Кариев исемендәге Казан Татар дәүләт яшь тамашачы театры 33 сезонның «Озын-озак балачак» дип исемләнгән икенче премьерасын тәкъдим итте. Башкорт әдәбияты классигы Мостай Кәримнең автобиографик повесте сәхнәдә ике көндә дә аншлаг белән барды.

“Инсценировка әсәр кебек үк хронологиягә корылмаган. Идеягә килгәндә, әлеге геройларда Мостай Кәрим үзе ачыла. Безнең төп максатыбыз персонажларны уйнау түгел, ә алар турында сөйләп бирү”, - ди Илсур Казакбаев.

Повестьның төп хикәяләүчеләре – Кендек (Булат Гатауллин) Олы инәй (Халидә Сөнгатуллина) булса, Кече Инәй - Гөлназ Галимуллина, Әсгать, Вәлиулла - Эльдар Гатауллин, Кара Йомагол, Ибрай - Рәис Әхмәтзакиров, Мәрәхим, Искәндәр - Илнар Низамиев, Акйолдыз - Альбина Гайзуллина,
Людмила - Алсу Шакирова, Вәлетдин - Илназ Хәбибуллина, Шаһидулла - Рамил Вафин һ.б. булды.

Сәхнәдә актерлар белән беррәттән фотосурәтләрдән ясалган сыннар гәүдәләнеш тапты. Әлеге алым классик әсәрне бөтенләй яңа, гадәти булмаган яктан ачты. Мостай Кәримнең замандашларына ошатып, борынгы фотоларны кулланып ясалган ул сыннар, гомумән, декорацияләр - «Алтын битлек» театр премиясе лауреаты, рәссам Альберт Нестеров (Уфа) идеясе.

Куючы хореограф – «МеЖдуТанцем» остаханәсе җитәкчесе Ольга Даукаева (Уфа). Композитор – Башкортстан республикасы композиторлар союзы әһеле Магыйлә Мәҗинова (Уфа). Ут буенча рәссам – Илшат Сәяхов.

Әлеге иҗат төркеме эшчәнлеге нәтиҗәсендә кыю сәнгать әсәре барлыкка килде. Сәхнәдә ат сынын “җанландыру”, “өзелгән үгез койрыгы” кулланып, тетрәндергеч эпизод тудыру һәм тере кошлар булу - тамашачыны образлы һәм реаль дөнья белән очраштырды.

Бу повестьның беренче һәм иң танылган куелышы Рәсәйнең иң билгеле режиссер-куючыларының берсе Рифкать Исрафилов тарафыннан эшләнде, аның артыннан шактый күп яңа спектакльләр куелды. Шул сәбәпле, иҗат төркеменең максаты - классикага мөрәҗәгать итеп, ниндидер яңалык кертү булды.

Спектакльне Кариев театрында янәдән 11 ноябрендә карап булачак.