09.10.2020 Мәдәният

“Озын-озак балачак” спектакленә озын-озак вакыт калмады (матбугат конференциясеннән ФОТОрепортаж)

Кариев театрында “Озын-озак балачак” спектакле премьерасына багышланган пресс-конференция узды. Анда Кариев театры баш режиссеры Ренат Әюпов, куючы режиссер Илсур Казакбаев һәм төп рольне башкаручы Булат Гатауллин катнашты. Чарадан фоторепортаж тәкъдим итәбез. Шулай ук журналистлар каршында яңгыраган кайбер кызыклы фикерләр - сезнең игътибарыгызга:

Ренат Әюпов: “Узган 2019 елда М.Кәримнең тууына 100 ел тулу уңаеннан Башкортстан республикасында театр сәнгатен күтәрү буенча күп чаралар үткәрелде. Шул исәптән, мин июль аенда М.Кәримнең "Безнең өйнең яме" повестен сәхнәләштердем. Ә быел исә Илсур безнең чакыруны кабул итеп, шул ук авторның "Озын-озак балачак" автобиографик повестен сәхнәгә куйды. Инде менә, ниһаять, ике көннән Илсурның премьерасы бездә яңгыраячак”.

Илсур Казакбаев: “Идеягә килгәндә, әлеге геройларда Мостай Кәрим үзе ачыла. Безнең төп максатыбыз персонажларны уйнау түгел, ә алар турында сөйләп бирү. Инсценировка әсәр кебек үк хронологиягә корылмаган.

Минем максатларымнан берсе, балалар һәм аларның әти-әниләренә кызык булган спектакль кую. 10-12 яшьтәге балалар тормышның төп төшенчәләрен инде аңлыйлар. Әлеге әсәр балаларны кешедә Кешене күрергә өйрәтә. Мәхәббәттә үскән бала башкаларга карата мәрхәтәмле, гафу итә, башкаларны аңлый белә, ә бу үз чиратында тыныч-имин дөнья асылыдыр. Әлеге катлаулы текстның фәлсәфәсе шул яктан ачыла".

Булат Гатауллин: “Шәхсән минем өчен бу әсәр бик кадерле. Әле беренче курста укыганда, курсыбызның мастеры – Тәслимә апа белән без шушы әсәр буенча этюдлар куйган идек. Шул вакытта, Тәслимә апа повестька карата мәхәббәт уяткан иде. Әле анда балалыгым белән мин кайбер әйберләрне аңламаганмындыр да, хәзер инде күбрәк төшенәм. Бик катлаулы әсәр, ләкин бик кызыклы. Актер буларак та шушы торышта эзләнергә бик рәхәт. Дулкынланабыз, ләкин бу премьераны зарыгып көтәбез.”

---
Кариев театры
№ --- | 09.10.2020