18.09.2020 Авыл

Билгесез хайван тавыкларны кыра

Уфа районының бер авылында яшәүчеләр шәхси хуҗалыкларга билгесез хайван һөҗүм итүе турында чаң кагалар. Какмаслык та түгел: һәр төн саен авылда тавыклар үлә. Ниндидер билгесез хайван, төнен ихаталарга кереп, йорт кошларын кыра. Бер ханым сөйләвенчә, аның 40 тавыгын талаганнар. “40 чебешнең барысы да таланган. Хәтта тимер челтәр дә кимерелгән”, – дип язган ул социаль челтәргә.

Авыл халкының күпчелеге кош-кортларга ташландык дачаларда яшәүче хуҗасыз этләр һөҗүм итә дигән фикердә. Бу уңайдан кешеләр арасында бәхәс туган: берәүләр мондый этләрдән котылырга кирәк, дисә, икенчеләр аларны стерильләштерергә, ашатырга кирәк дип исәпли.

Биология фәннәре кандидаты, доцент, БДУның зоология музее мөдире Михаил Кривошеев әйтүенчә, йорт кошларына этләр ташланырга мөмкин, әлбәттә. “Әмма еш кына кошларны күпләп үтерү сусар гаиләсенә караган ләтчә (ласка), көзән (хорек), ас (горностай), шулай ук сусарның (куница) үзенә хас, – ди. – Алар корбаннарының муенын яки муен умырткасын кимерә. Кош-корт яки кроликлар күп булуын күргән ерткычарда “комсызлык” уяна һәм алар күзләренә күренгән барысын да “тураклый” башлый. Алар ихата-сарайларга тиз үтеп керә ала. Мәсәлән, ләтчә уч буе кадәр генә, шуңа ул теләсә нинди тишеккә һәм читлеккә үтеп керә”.

Сусар гаиләсенә караган хайваннар, зыян салуларына карамастан, экосистемада мөһим роль уйный, алар кимерүчеләрнең санын арттырмый, дип тә аңлата эксперт.

Әлбәттә, күпме көч салып үстергән, күз терәп торган кош-кортыңның бер төндә юкка чыгуы күңелсез хәл. Бигесез хайванның эзенә төшәрләр, дип ышаныйк.

Автор : Язгөл Сафина

Чыганак: www.bashinform.ru

Фото: www.bashinform.ru

---
Өмет
№ --- | 18.09.2020