Челтәрле бизнес хәләл була аламы? Нинди шартлар кирәк (СОРАУ-ҖАВАП)

Челтәрле маркетингка кереп акча эшләргә теләүчеләр саны көн саен артып тора. Алар арасында популяр артистлар да, татар җырчылары да бар. Бу челтәрле бизнес хәләл була аламы? “Иске таш мәчете” имам хатыйбы Рамил хәзрәт Юныс үзенчәлекле сорауга җавап бирә.

“Беренчедән, шуны әйтергә кирәк, челтәрле сату ваклап сатуга тиң. Ул үзен үстерү өчен реклама кулланмый, димәк, акча янга кала. Ләкин челтәрле маркетинг хәләл булсын өчен, ул берничә шартларга туры килергә тиеш:

1. Сез тәкъдим иткән продуктта исламда тыелган ингредиентлар булырга тиеш түгел.

2. Продукт югары сыйфатлы булырга тиеш.

3. Компаниядә эшләүче кеше продукцияне сатудан тыш, компаниянең эшчәнлеге, товарларның составы турында белергә һәм үзе дә шушы товарларны кулланырга тиеш.

Әгәр бу шартлар үтәлә икән, челтәрле бизнеста эшләнгән акчалар хәләл булачак. Ягъни бу юл белән акча эшләү рөхсәт ителә.  Аллаһы Тәгалә һәркемгә башлаган эшендә рәхим-шәфкатьле булсын, хәер-фатихасын бирсен! Аллаһының ризалыгын алу өчен яшәгез һәм үсегез!” - дип аңлата Рамил хәзрәт Юныс.