КАЗАН ЮЛЛАРЫ НИ ХӘЛДӘ?

Казанда юлларны төзекләндерү эшенең кызган чагы. Шәһәрнең кайсы ягына барма - һәркайда юллар, транспорт чишелеше, җәяүлеләр юлы төзелә. Шуның аркасында көннең теләсә кайсы вакытында «бөке»ләр хасил була. Ә Казан юллары, чынлап та, тузган хәлдә һәм аларны 2013 елда узачак Универсиадага рәткә китерергә кирәк. Бүгенге көндә 2010 елга куелган планның яртысы диярлек үтәлгән.

Агымдагы елда төзекләндерергә планлаштырылган 100дән артык объектның 52сенә ремонт ясалды. Районнар буенча түбәндәге эшләр башкарылган:

   1.Авиатөзелеш районында 7 объект төзекләндерелгән, 2 объектта ремонт эшләре бара.

   2. Вахитов районында 10 объект төзекләндерелгән, 6 объектта ремонт эшләре бара.

   3. Киров районында 9 объект төзекләндерелгән, 9 объектта ремонт эшләре бара.

   4. Мәскәү районында 7 объект төзекләндерелгән, 1 объектта ремонт эшләре бара.

   5. Яңа Савин районында 5 объект төзекләндерелгән, 5 объектта ремонт эшләре бара.

   6. Идел буе районында 7 объект төзекләндерелгән, 9 объектта ремонт эшләре бара.

   7. Совет районында 8 объект төзекләндерелгән, 4 объектта ремонт эшләре бара.

«Берничә атна дәвамында Мәскәү районының Васильченко урамын төзекләндердек. Көндез машиналар хәрәкәте көчле булгач, төннәрен эшләргә туры килде. Хәзерге вакытта Киров районының К.Цеткин урамында эшлибез. Биредә трамвай юлларын алып аттылар, без аны тигезләп асфальт юл җәячәкбез. Цеткин урамын 6 августка кадәр ремонтлау бурычы куелды, әлегә эшләр план буенча бара. Гомумән әйткәндә, быел эш бик күп, кайвакыт хәтта ялсыз да эшлибез», - дип сөйләде «ДСК Авто» оешмасында грейдер йөртүче булып эшләүче Рамил Шакиров.

Чакрымнарга сузылган юлларны төзекләндерүдән тыш, Казанда шулай ук чокырлар да ремонтлана. KZN.RU хәбәр итүенчә, юл хезмәткәрләре тарафыннан барлыгы 75 мең квадрат метр юл төзекләндерелгән. Быел республика хөкүмәте чокырларны ямау эшенә 47 млн.сум бүлеп бирде, шуның 96 проценты, ягъни 45 млн.сумы, инде сарыф ителгән.