29.02.2020 Дин

Ильяс Халиковның әнисе батюшка белән дуслашкан

Ильяс Халиковның әнисе христиан дине вәкиле белән, алай гына да түгел батюшканың үзе белән яхшы танышлар икән. Ильясның концертына килгән әнисе белән Олег батюшка очрашып, дусларча күрешәләр. Әнисенең христиан динендәге, кара ряса киемле батюшка белән күрешүен күреп җырчы бер мәлгә сүзсез кала. “Дөнья менә шундый түгәрәк ул, дуслар. Концерт карарга килгән әнинең Олег батюшка күрешеп, исәнләшүенә шаккаттым. Әнинең без белмәгән дуслары бар икән!” – дип сөйли.

Аларның танышу тарихына күз салсак: христиан рухание Олег батюшка Казанга барышлый автоус тукталышында бер әбине утырта. Бу Ильяс Халиковның әнисе булып чыга.

“Юл буе без апа белән сөйләшеп бардык. Дини темага да, тормыш, яшәеш турында бик күп сөйләштек. Һәм шунысы кызык: бар нәрсәдә дә без бер фикердә булып чыктык. Аның шулкадәр яхшы кеше, якты, чиста күңелле икәнен бер крүдә аңлашылды, ничек утыртмыйсың инде. Шуны әйтергә кирәк, минем ашыга-ашыга барган урында билгеләнгән чараны кичектерделәр һәм миңа кире кайтып китәргә туры килде. Шулай да мин үземне бушка йөреп кайттым дип санамыйм, димәк Алла мине бу апаны юлда калдырмас өчен, юлда интекмәс өчен аның юлына чыгарган, дип үземә шундый нәтиҗә ясадым. Менә бит нинди могҗиза! Без кешеләр бер-беребезгә булышып, яратып-хөрмәт итеп яшәргә тиешбез. Нинди генә дин вәкиле булсак та, безне барыбер бер югары көч берләштерә. Аллаһ ул бер, ул безне аермый, ә берләштерә!” – дип сөйли Олег батюшка. Шулай ук Ильяс Халиков һәм "Мөнбәр" татар дини театры концерты турында җылы сүзләрен, соклануын җиткерә. "Бу концертта үземне чит итеп тоймаммы дигән шикле уйлар белән килгән идем, юк киресенчә, үз кеше булып утырдым. Үземне шулхәтле рәхәт хис итеп, бөтен нәрсәне аңлап карап утырдым" - ди батюшка Ислам диненә нигезләнгән концерт турында.